Silaginnera poortugarpassuarnut iluaqutaasimavoq
Poortukkat allakkallu taamaattoq ajornartorsiutitaqanngitsumik apuuffissaminnut apuunneqarumaartut, Tele Postimi tuniniaanermut pisortap Salik Hardip oqaatigaa:
- Timmisartukkut decembarip aallartilaarnerani ajornartorsiuteqalaarnikuugaluarpugut, silap ilaatigut ajornera aamma pissutigalugu kinguaattooqqalaarnikuulluta, kisianni pissutisit aaqqinnikuupput. Arlaatigut ajutooriataartoqassanngippat ilimanarpoq apuunneqartussat piffissaq eqqorlugu apuunneqassasut, Salik Hard oqarpoq.
Allakkat 200.000-it missaat poortukkallu 60 tonsit missaat Tele Postimit qaammatip ataatsip ingerlanerani isumagineqarsimapput, tunniussinissamillu piffissaritinneqartut inuit ataatsimut isigalugu malissimavaat:
- Inuit piffissaq eqqorlugu tunniussisarsimanerat malunnarpoq, ilaqarporli kingusinaalaarlutik tunniussissarsimasunik, sapaatilli-akunnerata siuliani ajornartorsiortoqarnera pissutigalugu timmisartut assartuisussat ilaneqarput, nassiussallu taamaasillutik piffissaq eqqorlugu apuunneqarsinnaassallutik, Salik Hard oqarpoq.
Tunumut assartuineq kinguaattoorfuilaarsimavoq, timmisartorli assartuisussaq Air Greenlandimit decembarip 19-iani Tasiilamut assartuivoq, nassiussallu juullertinnagu apuunneqassangatinneqarput, soorlu aamma Qaanaamut Pituffimmullu aqagu decembarip 22-ani apuunneqassangatinneqartut.
Email atorlugu allanneq internetikkoorlugulu allatsitsineq annertusiartortoq Tele Postimit maluginiarneqarpoq:
- Allakkat ataatsimut isigalugit ukiup ataatsip ingerlanerani ikiliartorput. Tamanna tupinnanngilaq, inuimmi email atorlugu allattaramik. Poortukkat siornamut naleqqiullugu aamma amerliartortut maluginiarparput, interneti atorlugu pisiortortoqarnera pissutaagunarmat, Tele Postip tuniniaanermut pisortaa Salik Hard oqarpoq.