Silaannarmik mingutsisitsinerujussuani Kinap millisarnialerpaa
Biiliutillit arlallit, ulloq allortarlugu biileqqusaannginnerminnik unioqqutitsisimasut tallimanngormalli akiliisinneqarsimapput. Akiliisitaanissamik sioorasaarutit sunniuteqarsimagaluartut, taamalu biilinik ingerlaniarneq ajornannginnerulersimagaluartoq, taamaattoq Beijingimi silaannarmik mingutsitsineq anigorneqarsimanngilaq.
Biilit 3 millioninik amerlassuseqartut Beijingimiittut mingutsitsinerat pissutaalluni Naalagaaffiit Peqatigiit peqqinnissakkut suleqatigiiffiata, WHO-p, inuit taqqakkut milittoornermik eqqorneqaqqajaasut aasaqqippat OL-eqalerpat Beijingiliaqqunagit kajumissaarpai. Aammattaaq silaannarmik mingutsitsinerujussuaq pissutaalluni inuit anernikilliortartut anersaartorniarnertik ajornartorsiutigilersinnaagaat, WHO mianersoqqusivoq. Tamatumunnga peqatigitillugu Nunat tamalaat olympiademut ataatsimiititaliaat nalunaarpoq, Beijingimi silaannarmik mingutsitsineq iliuuseqarfigineqanngippat, timersuutit qasunarnerusut, soorlu nunaannakkut cykilerneq, ingerlanneqarsinnaanavianngitsoq.
Kinami suliffissuit mingutsitsinerpaat matuneqareerput. Angerlarsimaffiillu tuusintilikkaat aamarsuarnik atuiunnaarlutik gassimik atuilissapput. Aamma tassa misiligutigalugu Beijingimi ulluni sisamani ilaatigut ulloq allortarlugu biileqqusiunnaarneq ingerlanneqarpoq.
Koreami Kujallermi Seoul-imi 1988-imi OL-ertoqarmat mingutsitsineq millisarniarlugu aamma taamaaliortoqarpoq. Aamma Grækenlandimi illoqarfiit pingaarnersaanni, Athenimi, 2004-mi OL-ertoqarnissaa ukiunik qulinik sioqqullugu silaannarmik mingutsitsineq iliuuseqarfiginiarlugu biilinik killilersuisoqarpoq.
Naak Beijingimi silaannarmik mingutsitsineq tallimanngormalli minnerulaalersimagaluartoq, cykilertartut misilillugu ingerlaarsimasut neriuutissaqarpallaanngillat, tassami taakkua mingutsitsineq pissutigalugu iluamik anersaartorsinnaasimanngillat.
Naak Kinami oqartussat neriulluaraluartut, WHO-mit OL sioqqullugu mingutsitsinerup minnerulersinneqarnissaa ilimagineqanngilaq.
