Silaannarmik mingutitsisumik CO2-mik aniatitsisut annertussusiat takuneqarsinnaalerpoq

Tamanna Naatsorsueqqissaartarfiup ukiormanna siullermeerluni nukimmik atuinermik nalunaarusiaani takuneqarsinnaavoq. Nalunaarusiaq nukimmik atuinermut tunngatillugu aningaasarsiornikkut naalakkersuinikkullu pingaarnersiuinermi atorneqassasoq, nalunaarusiortuni suleqataasup, Lene Baunbekip oqaatigaa.

- Taamaalilluta inuutissarsiutit sorliit nukimmik atuinerunersut, taamalu CO2-mik aniatitsinerunersut takusinnaalerparput. Kisianni kisitsisit misissoqqissaarneranni eqqaamasariaqarparput, inuutissarsiutini ataasiakkaani ingerlatsineq, taamalu sulliviit ataasiakkaat ingerlatsinerat, atuisut ataasiakkaat imaluunniit sulliviit ataasiakkaat piumasaqaataat apeqqutaatillugit ingerlanneqartarmat. Tassa nukimmik atuineq aningaasarsiornikkullu qaffakkiartortitsineq imminnut atalluinarput. Taamaattorli nukimmik atuinermik nalunaarsuisalernitsigut, pitsaanerusumik nukimmik atuinermik ileqqaarfiusinnaasunik pingaarnersiuisinnaalerpugut, Lene Baunbek oqarpoq.

Taanna aperineqarami CO2-mik aniatitsinerup inuutissarsiutinut agguataarnera qimerlooraanni suut ernumanartoqarnersut, akivoq, CO2-mik aniatitsinerup inuussutissarsiutinut agguataarnera inuiaqatigiit aaqqissuussaanerannut naapertuuttuusoq. Tassa aalisarnerup piniarnerullu inuutissarsiutini pingaarnersaanerat takuneqarsinnaasoq, taamaattumillu inuutissarsiutit taakkua tupinnanngitsumik inuutissarsiutinut allanut sanilliullugit CO2-mik aniatitsiffiunerusut.

- Aalisarneq ineriartortinneqarpoq taamalu inuiaqatigiinni aningaasarsiornermik qaffassaaqataalluni. Ukiunilu aggersuni aatsitassarsiornerup taamatut ingerlalernissaa naatsorsuutigineqarpoq. Taamaattumik tunisassiornermi ukiuni aggersuni CO2-mik aniatitsinerulernissaq naatsorsuutigisariaqarpoq. Taamalu maanna apeqqutaalerpoq: Qanoq ililluni Kalaallit Nunaata suliffissuaqarnikkut ineriartortitsinini qulakkeersinnaavaa, Kyotomi isumaqatigiissut naammassiniaatigalugu

Lene Baunbek Naatsorsueqqissaartarfimmeersoq nukimmik atuineq pillugu nalunaarusiamik suliarinnittuuvoq.