Silaannaq pillugu nalunaarusiaq nutaaq ullumi saqqummiunneqarpoq
Gassit silaannarmik kissakkiartortitsisartut annikillisinneqarsinnaapput – silaannaap allanngoriartornera pissutigalugu ajunaarnersuarmik taamaalilluta pinnngitsoortitsisinnaalluta.
Silaannaq pillugu Naalagaaffiit Peqatigiinni sassartitat ilisimasallit nalunaarusiaanni nutaarluinnarmi tamanna erserpoq, nalunaarusiaq taanna Thailandip illoqarfiisa pingaarnersaanni, Bangkokimi, ulloqeqqata siorna saqqummiunneqarpoq.
Nalunaarusiamili paasititsissutigineqarpoq, gassit silaannarmik kissakkiartortitsisartut 2 – imaluunniit 2,8 gradi ataassimassappassuk, CO2-mik silaannarmut aniatitsineq kingusinnerpaamik ukioq 2015-imi nungoreersimassasoq.
- Tamanna unammillernartorujussuussaaq, politikkikkut piumassuseq tasani apeqqutaasorujussuussalluni, aningaasartuutillu annertoorujussuanngortussaapput. Sorpassuarnulli periarfissiissaaq, soorlu angallannermut, sanaartornermut, nunalerinermut, ilaalu ilanngullugit. Sanaartorneq eqqugaanerpaassaaq, tassanimi CO2-mik toqunartumik piiaaneq 30 procentimik annikillisinneqassaaq, Avatangiisit pillugit aqutsisoqarfimmeersoq, Katrine Krogh Andersen, Bangkokimiit oqarpoq.
Nalunaarusiamik suliarinnittut ilisimatuut 400-t ilisimatitsissutigaat, CO2-mik aniatitsineq annikillisinniarlugu nunarsuarmi naalakkersuisut iliuuseqapallattariaqartut, ukiunimigooq tulliuttuni 20-ni 30-ni tamanna apeqqutaasorujussuussammat.
