Silaannaq pillugu nalunaarusiaq nersualaarneqarpoq
Issittumi siunnersuisoqatigiit aallartitaat Islandimi ullumi ataatsimiilerput, Islandip siunnersuisoqatigiinni siulittaasuunini naggaserlugu nunamini ataatsimiititsivoq.
Islandip nunanut allanut ministeria David Oddsson ataatsmiinnermi aqutsisuulluni aammasuuvoq. Nunarput sinnerlugu peqataavoq aningaasaqarnermut nunanullu allanut tunngasunut naalakkersuisoq Josef Motzfeldt, ullumikkut 63-liilluni inuuissiortoq.
Ataatsimiinnermi sammineqassaaq nalunaarusiaq, silaannaap allanngoriartornerata kingunerissinnaasaanik missuinerup inernerisaa. Taassuma saniatigut Issittumi nunat siunnersuisooqatigiivisa naalakkersuisui siunniussami suleqatigiissutissaminnik atsioqatigiissapput.
Aaatsimiinnermi nalunaarusiaq saqqummiunneqartoq aatsaat taama sukimiitigisumik misissuinerit kingunerinik imaqarpoq. Nunarsuaq Sikuijuitsumiit isigalu sisamanik immikkoortunngorlugu misissorneqarsimavoq, misissuinerlu taanna ilisimatuut, inuinnaat suliniaqatigiiffiillu peqatigiillutik suliarivaat nunani nunaqavissut suleqatigalugit.
Maani ataatsimiinnermi sammineqartut ilagaat issittup imartaa pillugu nalunaarusiaq.
Oddssonip naqissuerpaa ingammik ukiuni kingullerni marlunni nunat issittumiittut paaseqatigiinnerulersimanerat mingutsitsinerullu annikillisarneranut alloriaqatigiissimanerat. Inuuniarneq aningaasaqarniarnerlu eqqumaariffigineqarnerulersimapput, nunallu peqataasut akornganni attaveqatigiinneq annertusisimalluni. Nalunaarusiaq nutaaq annertoqisoq nersualaarpaa oqaatigalugu naalagaaffinni pisortat soqutisaqaqatigiillu nalunaarusiami suleqatigiinnertik ataatsimoortut misinerannut aqqutissiuussisimasoq.
Nalunaarusiap eqqartornerani Oddsson kaammattuivoq silaannap allangornerata kingunerisaanik aningaasaqarnikkut kulturikkullu periarfissat nunaat eqqumaffigineqarnissaat.
Islandip nunanut allanut ministeria David Oddsonnip ilanngullugu kaammattuutigaa silaannaap allanngoriartornera ilutigalugu issittumi siunnersuisoqatigiit ilaasortaatitaat aningaasaqarneq kulturimullu periarfissat eqqumaffigineqartariaqartut. Russit peqataatitassaat marluk Islandimut aallariartorlutik biilimi ajunaarsimasut, nunanut allanut ministerip ilanngullugu ataatsimeeqataasunut nalunaarutigaa.
