Silaannaq pillugu inatsisiliornialerput

Tuluit Nunaat naalagaaffinni siullersaalluni silaannaap pissusaanut tunngasumik inatsisiliornialerpoq. Naalakkersuisut maanna inatsisissatut siunnersuummik saqqummiussaqarput; inuiaqatigiit tuluit gassimik CO2-mik aniatitsinerisa 2050 nallertinnagu 60 procentimik minnerulersinneqarnissaanik pisussaaffiliisussamik.

Silaannaap allanngoriartornera nunat ilaanni oqaluuseriumaneqarneq ajorpoq. Nunat ilaat nunat tamat akornanni isumaqatigiissuteqarnermikkut imminnut pisussaaffilertarput, naalakkersuinermillu suliaqartut anguniagassaminnik pilersitsisarput. Taamaattorli Tuluit naalakkersuisui isumaqarput silaannaap pissusaannut tunngasut inatsisiliuunneqartariaqartut.

- Tamanna isumassarsiatsialassuuvoq, taama isumaqarput Europa-mi silaannaap pissusaanut pinngortitamullu suliniaqatigiiffiit 100-t sinneqartut kattuffianneersut.

- Silaannaap pissusaanut atatillugu iliuuseqarnissamik isumaqatigiissutit ajunngilluinnarput. Kisianni soorluuna inatsisinngortinneqaraangamik aatsaat pisussaaffiliisartut.

Tuluit inatsisissatut siunnersuutaat ukiunut tallimanut anguniagassanik imaqarpoq, taakkualu 2050-ip tungaanut anguniagassat ilagiinnarpaat.

Tamanna illuatungiliuttunit uparuarneqarpoq, oqartoqarluni pilersaarutit qatangiinnartinneqarataannaasut, ukiumoortumik anguniagaqartoqanngippat.

- Ukiumoortumik anguniagaqarneq sakkortunerusumik pisussaaffiliissaaq, suliniaqatigiiffiit kattuffiannit oqartoqarpoq. Kisianni anguniakkanik inatsisinngortitsiniarneq naammagisimaaneqarpoq. Taakkuali CO2-mik aniatitsinerup 2050-imi 60 procentimik minnerulersinneqarnissaa naammaginngilaat.

- 80 procentimik minnerulersinneqartariaqaraluarpoq, oqarput.

Nunat EU-mut ilaasortat 27-usut gassinik CO2-nik aniatitsinertik ukioq 2020 nallertinnagu 20 procentimik minnerulersinniarlugu sapaatip akunnerata siuliani isumaqatigiissutigaat.