Silaannaq pillugu inatsisiliaq Australiap itigartippaa

Australiami senatip silaannaq pillugu inatsisiliat ataatsimoortut taasissutigigamigit itigartipaa Autraliamilu naalakkersuisut oqarnerat naapertorlugu inatsisiliat silaannaq pillugu politikkeqarnermi Australia siuttunngortittussaagalaraat.
aggustip 13-at 2009 11:18

Inatsisiliat tunngavigalugit Australiap CO2-mik aniatsitsinera annikillilerneqartussaagaluarpoq. Senatimi taasinermi amerlanerussuteqarnissamut naalakkersuisut akuerserusuttunik arfineq-marlunnik amikkittoorput. Akerliusullu 42-usut isumaqatigiippallaanngillat.

USA-mi kongressip USA-p silaannaq pillugu politikkissaa Københavnimi ataatsimeersuarnermi saqqummiunneqartussaq pitinnagu Australiami illuatungiliuttut aalajangersaarusunngikkallarput.

Akerliusuni 42-ini tallimat Det Grønne partiimeersuupput. Taakkua pilersaarut saamasaarpallaarsoraat isumaqatiginninniartoqaqqinnissaanillu naalakkersuisullu neqeroorfigalugit.

Silaannarli pillugu politikkissaq Australiami naalakkersuisut imaasiinnarlugu unitsinnianngilaat taannalu pillugu qinersisoqarnissaanik suaaruteqariaannaallutik.

Innuttaasunik isumasiuinerni naalakkersuisut tapersersorneqarluarput silaannarlu pillugu politikkimik assortuunneq naalakkersuisunut iluaqutaaginnartussaavoq.

Aalajangiinissaalli Københavnimi ataatsimeersuarneq sioqqullugu kingornaluunniit pissanersoq apeqqutaaginnalerpoq.

Australiap suliniuteqaqataasutut anguniagalittullu imaluunniit periarfissarsiorluni qamarusaaginnartutut Københavnimi ataatsimeersuarnermi peqataanissaa ataatsimeersuarnermut sunniuteqarataannaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq