Silaannakkut angallassisut aaqqiageeqqilerput
Sulinngiffeqarlutik angalaniartorpassuit taamaalillutik aallarsinnaanngorput allallu angalareersimasut utimut timmisartorsinnaanngorlutik.
Air Greenlandimiit nalunaarutigineqarpoq, ilaasut ulluni kingullerni angalanissaminnik allanngortitsisut taanna pigiinnarsinnaagaat imaluunniit allanngortitsinnginnermi pilersaarutiminnut allanngortitseqqissinnaasut. Kisianni inissaqarneq tamatumani apeqqutaassaaq. Ilaasussat annerusumik paasisaqarusukkunik 34 33 44-mut sianersinnaapput. Oqarasuaat taanna ullumi tallimat tungaanut ammassaaq.
Tusagassiuutinut nalunaarummi naatsumi oqaatigineqarpoq, illuatungeriit aaqqiagiikkunnaarnissap killerpiaani ippassaq unnukkut isumaqatigiissimasut. Kisianni sooq qaangerneqarnersoq illuatungeriit oqaatigiumanngilaat.
Isumaqatigiissut ilaasortanit tamanit taasissutigineqartinnagu imaa saqisut peqatigiiffiannit Air Greenlandimilluunniit oqaaseqarfigiumaneqanngilaq.
Tassalu illuatungeriit qaammatini tallimani najummatsisimanartumik isumaqatigiinniarnerni pissusertik allanngortinngilaat, innuttaasunut pisariaqartunik paasissutissiissanatik, ilaaniartorpassuillu nalornisillugit.
Isumaqatigiissut saqisut akuersaassaneraat, aatsaat aggustip aqqarnani paasissavarput. Saqisut naaggaareernikuupput, taamaalioqqippatalu, aallaqqaataaniit aallarteqqissapput.
Illuatungeeriilli maanna nuannaarallarput.
- Qaammatini tallimani isumaqatigiinniarsimanerit eqqarsaatigigaanni, isumaqarpunga inernera oqiliallaataassasoq, ilaasorttattalu sulineq nuannarigamikku, nuannaarlutik suliartussapput. Saqisut peqatigiiffiata siulittasua Anders Mark Jensen oqarpoq.
Aamma Air Greenlandip tuniniaanermut ussassaarusiornermullu pisortaa, Christian Keldsen iluarisimaarinnippoq.
- Isumaqatigiissutip imaa pillugu oqaaseqarsinnaanngilanga, kisianni aaqqiissutissamik, iluatungeriit tunuliaqutiminnut saqqummiussinnaasaannik, isumaqatigiissuteqarpugut, Christian Keldsen oqarpoq.
- Iluarisimaaqaarput, suliumajunnaarnermik misillertitsissannginnatta, nalinginnaasumillu timmisartuusseqqilissagatta, ullumilu timmisartuussinissat pilersaarutit malillugit ingerlassapput, Christian Keldsen oqarpoq.
