Silaannakkut angallassinnermi suliumajunnaarneq pinngitsoorialerpaat
Isumaqatigiinniartut ataatsimiinneq sioqqullugu tamarmik isumalluarput suliumajunnaartoqarsinnaannerata pinngitsoortinnissaanut.
Air Greenlandimi sulisoqarnermi pisortaq Mads B. Christensen ippassigami radioavisimut oqarpoq, akerleriit isumaqatigiinniarnerat ajunngitsumik ingerlasorisimallugu, taamaattumillu suliumajunnaaniarneq Air Greenlandimiit tupaallaatigineqartoq. Taassumalu isumaqatigiinniarnerit maanna ajunngitsumik ingerlaqqiinnissaat neriuutiginerarpaa.
Flymekanikerit sinnerlugit isumaqatigiinniartussat aamma suli isumalluarput.
Flymekanikerit isumaqatigiinniarnermi ingerlatsisuata kattuffimmi allatsip Keld Bækkelund Hansenip sapaatip akunnerata naanerani Air Greenlandimi flymekanikerit ataatsimeeqatigai.
Taanna naapeqqinnissamut piareersimanerarpoq, isumaqarporlu akerleriit akornanni isumaqatigiittoqarsinnaasoq.
Isumaqatigiinniarnermi illuatungeriinnit suliumajunnaarnissaq anguniarneqanngilaq, Keld Bækkelund Hansen erseqqissaavoq .
2008-mi akissarsiat pillugit isumaqatigiinniarnermi flymekanikerit
akissarsiaat sulinermilu iluaqutissarsiaat 17, 3 procentimik qaffariarput. Akissarsiaat tapisiaallu assigiinngitsut 600 koruunimit 1000 koruunip missaanik qaammammut qaffapput, taassumalu saniatigut napparsimanermi sillimmasiissutaat soraarnerusutisiassaallu iluarsiivigineqarlutik.
Flymekanikerit taamanikkut isumaqatigiinniarnermi ingerlatsisuat Kenneth Bergen oqarpoq akissarsiat pillugit isumaqatigiissut Kalaallit Nunaanni isumaqatigiissutit pitsaanersarigaat.
Isumaqatigiinniarnerit pingasunngornerup tungaanut piffissalerneqarsimasut, Air Greenlanimi tusagassiisarnermut pisortaasup Pia Christensen Bangip nalunaarutigaa.
