Silaannakkut angallanneq silamit ajoqusersorneqarpoq

Kalaallit Nunaata kitaani silarlunnera silaannakkut angallassinermut annertuumik ajornartorsiortitsivoq. Sermernarsinnaaneranik silaannallu unerisimannginnissaanik ilimasaarutit tallimanngornermi ullup qeqqata tungaanut timmisartuussinissat pisinnaajunnaartimmatigit Atlantikoq qulaallugu timmisartuussinissat aamma kinguaattuussapput.
Allattoq Nutaarsiassaqartitsivik / Nyhedsredaktionen
apriilip 26-at 2013 10:33

Air Greenlandip timmisartuussinissanik isumaginnittoqarfianit sila alaatsinaaqqissaarneqarpoq, isumannaatsuunissarlu pingaarnerpaarmmat aallarfissatut pilersaarutit nalilersorneqartuarput. Kangerlussuullu putsernerata nittaalleqattaarneralu ajornartorsiornermut ilasaataavoq, mittarfimmi taanna nalinginnaasumik timmisartuussinerni miffissamaataasaraluarami. Taamaammat Kangerlussuarmi sila pitsanngorpat timmisartuussinerit aatsaat ingerlanneqarsinnaalissapput.

Tallimanngornermi ullup qeqqarnerani nunatsinni timmisartuussinerit ualimut aallarteqqinneqarsinnaanissaat ilimagineqarpoq. Danmarkiliartussallu tamaasa apuunniarlugit unnugu Kangerlussuarmiit Danmarkimut timmisartuussisoqassaaq, timmisartuussinissallu aappaa unnuaru ingerlanneqarluni.

Sulisugut suna tamaat tikillugu malinnaaniarsaralutik ilaasussanut paasissutissiisarneq ingerlappaat. Angalasussat tamarmik attavigineqassaapput, neriuppugullu inuit paasinnillutillu naammagittassasut. 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq