Silaannakkut angallanneq kinguaattoorfiuvoq

Ulluni kingullerni Nunatsinni sila pitsaavallaanngimmat, timmisartumik angalasussat kinguaatoornernik misigisisaqartarput, ullumikkullu inuit 500-t missaanniittut kinguaattoornernik eqqugaassapput.

Air Greenland-mi pilerisaarinermik tunisassiornermilu pisortaq Hans Jørgen Mørch oqarpoq, timmisartuussinissat kinguaattooraluarlutik juulli nallertinnagu ilaasut orniguffissaminnut apuukkumaarnissaat neriuutiginartoq, silali kisimi apeqqutaavoq.

- Sinerissami sila ajormat, aatsaat ullumikkut ajornartorsiutit takkupput. Maannakkut sinerissami inuit 5-600-t aallarnissaminnut kinguaattoorput. Ullumikkulli ilimagaarput nuumminngaanniit Danmarkiliartussat angallanneqarsinnaanissaat. Timmisartoq Danmarkiliartoq akunnerit arfinilli kinguartissimavarput, ilaasussat tamakkerniassammata. Hans Jørgen Mørch oqarpoq nangillunilu: - sinerissami kinguaattoorfiusut aqagu aqaguagulu ingerlanneqarnissaat naatsorsuutigaarput, neriuppugullu angalasussat tamarmik apuuffissaanut juullertinnagu ingerlassinnaassallutigit. Aamma timmisartuni aquttut kinguaattoortarnissanut piareersimapput. Aamma allanngitsuuittoqassagaluarpat unnuisarnissat naatsorsuutigineqartassapput, tamanna aamma ajornartorsiutaanavianngilaq, siornatigummi tamanna misilereernikuuarput.

Air Greenland-mi tunisinermi pilerisaarinermilu pisortaq Hans Jørgen Mørch taama oqarpoq. Poortukkat allakkallu timmisartukkut nassiussat 12,5 tonsit Kangerlussuarmi uningasut aamma oqaatigineqarpoq.