Silaannakkut angallaneq aallarteqqilluavippoq

Nunatsinni aamma Danmarkimi sapaatip akunnerani angalasinnaanatik utaqqisut ornitaminnut ullumi ulloq naallugu apuussorneqarput.

Atlantikoq qulaallugu angalaniartut 700-t missaanniittut Air Greenlandip timmisartortartunik aamma timmisartumi saqisunik mattussineranit eqqorneqarput. Nunatta iluani angalaniat 900-t missaanniittut eqqorneqarlutik.

Isumaqatigiissut nutaaq illuatungeriinnit ippassaq isumaqatigiissutigineqareersorlu timmisartukkut angallanneq aallarteqqippoq.

Angallassinissap erngiinnaq ingerlaqqilernissaa, illuatungeriit isumaqatigiissutigisimagaat, Air Greenlandimit oqaatigineqarpoq. Timmisartortartut oqaaseqartartuata oqarnera naapertorlugu, utaqqisorpassuit ornitaannut apuunniarlugit maanna tassa "mippiassanata angumersiniaavugut".

Nunarput tamakkipajaarlugu ullumi timmisartuussisoqarpoq aammalu aqagu taamaaliortoqassalluni.

Timmisartorsuaq Norsaq ilaasunik nassatanillu usilluni Kangerlussuarmut aqagu nalunaaqutaq ullaakkut qulip qeqqanut missaaq Danmarkimullu utissalluni nalunaaqutaq ataatsimut.

Atlantikoq qulaallugu timmisartuussinermut assigusumik nunatta iluani timmisartuussinerit pilersaarusiorneqassapput.

Aallarnissamut inniminniisoqarsinnaanngikkallartoq Air Greenlandimit oqaatigineqarpoq, taamaaliortoqarsinnaalissaaq aatsaat utaqqisut angallanneqarsimalileerpata. Utaqqisunik angallassinerup sapaatip akunnerata naanerani naammassineqarnissaa naatsorsuutigineqarpoq.

Isumaqatigiissutip inernera pillugu arlaannaalluunniit oqaaseqassanngitsoq illuatungeriit aamma isumaqatigiissutigaat.

Isumaqatigiissut illuatungeriit tunuliaqutiminnut akuerisassanngorlugu maanna nassiutereerpaat. Akuerineqarnera imaluunniit akuerineqannginnera, januaarip 21-anni saqqummiunneqassalluni.

Isumaqatigiissut illuatungeriit tunuliaqutaannit isumaqatigineqanngippat, mattussineq tulleq januaarip 26-anni aallarteqqissaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat