Silaannaap pissusia OLT-mi oqallisaaniarpoq

Ukiuni tulliuttuni nunarput OLT-mut siulittaasunngussaaq, OLT-lu nunanut naalagaaffinnullu EU-mut immikkut attuumassuteqartunut kattuffiuvoq.

Nunatsinniillu piumasarineqartutuut silaannaap allanngoriartorneranut avatangiisinullu tunngassuteqartut siunissami annertuumik sammineqartalissapput.

Josef Motzfeldt kangerlussuarmi aallariartulersoq oqaloqatigaarput, nipaata akornuteqarnera ilisimatsissutigissavarput.

- Aatsaat siullermiilinngitsumik silaannaap allanngoriartornerata qeqertarmiuararparujussuarnut qanoq sunniuteqarsinnaanera, nunatsinnuinnaanngitsoq sunniuteqartussaammat eqqartortarsimavarput. Aammalu massakkut nunatta siulittaasuunera, taavalu aamma taakkua ilaasortat aasaru septemberimi nunatsinnut tikinnissaannut atatillugu silaannaap allanngoriartornerata sunniutai imaasiallaannaq nunatsinni takuneqarsinnaasut namminneq isiminnik takugunikkit, taava EU-mut sunniuteqarniarnerput tamakkiullugu, nunat taakkua ilaasortat OLT-mut ilaasortat 15-iulluta EU-mut EU-llu aamma taamaalilluni USA-mut tunuliaqutaaniarluta taamatut nunatsinninngaanniit nalunaaruteqarpugut siulittaasuunitta nalaani silaannaap allanngoriartornera, taassumalu sunniutai aallunneqassasut

Soorlu Josef Motzfeldtip aatsaannguaq oqaatigigaa, aappaagu septemberimi Nuummi pisussami OLT-imi ilaasortat naapeqatigiinnissaanni nunarput aaqqissuisussaavoq, inuillu 110-t peqataassasut erseqqissaatigineqarpoq.

- Nunarput sinnerlugu OLT-p iluani bestyrelsemi ilaasortanngortitaavutit, ilaatigut formandinngortitaallutit, tamanna qanoq nunatsinnut sunniuteqassasoraajuk?

- Nunatsinnut sunnitissaa tassaaginnartussaavoq, nunat taakku ilaasortaaffigisatta, ilaatigut takornariaqarnikkut kiassusertik pissutigalugu ornigarneqarluartartut, massakkut taakkunani nunani nunatta takoqqusaarutigineqarnera takornariartunut taakkunani nunanut nunatsinnut sunniuteqarnissaa pinngitsoornani ilimagisariaqarpoq tamanna annertuumik sunniuteqaratarsinnaasoq.