Silaannaap pissusaa pillugu septembarimi ataatsimeersuartoqassaaq

Silaannaap pissusaa pillugu ataatsimeersuarnissami nunat peqataatitaqartussat ilaatigut tassaapput USA, EU-mi nunat ilaasortaatitat, Naalagaaffiit Peqatigiit, nunallu allat aqqanillit.

Gasit silaannarmik kiatsikkiartortitsisut ungasinnerusoq eqqarsaatigalugu annikillisikkiartortinnissaat ataatsimeersuarnermi siunertaavoq, Naalagaffiillu Peqatigiit, silaannaap pissusaa pillugu paasisimasallit oqarnerat malillugu, nunarsuarmi silaannaap kiatsikkiartorneranut tamanna patsisaavoq. Naalagaaffiit Peqatigiinni siulittaasoq, Ban Ki-Moon maajip qaammataani qulakkeerlugu oqarpoq, silaannaap pissusaa pillugu USA-mi septembarip qaammaataani ataatsimeersuartoqarnissaq siunniussimallugu, silaannaap pissusaa pillugu nunat tamat nutaamik isumaqatigissusiornissaat ilusilersorneqarniassammat.