Silaannaap kissatsikkiartornera ajoqutaassangatinngilaat

- Nunarsuarmi silap kiatsikkiartornera pillugu oqallinneq tamarmi inuup ineriartorneranik unitsitsisiniarneruvoq, EU-mi maanna siulittaasoq, Tjekkiami præsidenti, Václav Klaus, taama isumaqarpoq.

Nunarsuarmi silap kiatsikkiartorneranut politikkimut akerliusut New Yorkimi maannakkut ataatsimiipput, ataatsimiinnerullu nalaani taama oqarneq pivoq. Ataatsimiinneq qulequtaqartinneqarpoq: - Nunarsuarmi silap kiatsikkiartornera ajornartorsiutaassagami?

Inuit nuimasut 70-it ataatsimeeqataapput, nunarsuarmi silap kiatsikkiartorneranut inuit pisuussuteqarnerat taakku akuersaanngilaat. Aviisimi The Guardianimi taama allaaserinnipput.

Tjekkiami præsidentip, 67-inik ukioqartup, avatangiisit pillugit politikki marxismimut assersuuppaa. Ataatsimeeqataavortaaq silap pissusaanut ilisimatooq, Fred Singer, taanna isumaqarpoq sermersuup aakkiartornera pitsaasumik malitseqarumaartoq, soorlu Sullualuup sikuerunnera malitsigiumaaraa.

Aviisi The Guardian naapertorlugu amerikamiut 58 procentii isumaqarput nunarsuarmi silap kiatsikkiartorneranut inuit namminneq pisuussutigigaat.