Silaannaap kissakkiartornera nunatta iluaqutigisinnaavaa

marsip 05-at 2006 16:49

Nunarsuarmi silaannaap kissakkiartornera nunatsinnut aningaasatigut isertitsiffiulluarsinnaavoq.

Aatsitassarsiorfiusimasup Uummannap kangerluani Maarmoriliup eqqaaniittup sermip aanneratigut zinkeqarfik nuiartuaarsimavoq aatsitassarsiorfiup 1991-imi matuneraniit mannamut sermeq 250 meterinik tunuartillugu, taama oqarpoq Aatsitassanut Ikummatissanullu Pisortaqarfimmi ujarassiooq Lars Lund Sørensen, Torontomi aatsitassanut tunngasunut saqqummersitsisnersuarmi peqataasoq.

Piginneqatigiiffiup zink-imik Maarmorilimmi piaasinnaanermut pisinnaatitaaffeqartup maanna zink-imik piaasoqarsinnaanera anguniarlugu aningaasaliisussarsiorpoq.

Pilersaarut nunatsinnut aningaasatigut isertitsilluarfiusinnaavoq, tassami ukiuni kingulliunerusuni zink-ip akia marloriaatinngorsimammat.

Lars Lund Sørensen-ip aatsitassarsiorfiup ammaqqinneqarsinnaanera ullulersinnannginnerpaa, kisiannili radioaviisimut ima oqarpoq:

- Aqerlussap zinkilllu akii taamaginnassanersut apeqqutaalluinnarpoq, kisianni ukiut marluk pingasulluunniit iluani aatsitassarsiorfiup ammaqqinneqarsinnaanera ilimanarsinnaavoq, Lars Lund Sørensen oqarpoq.