Silaannaap allanngornera quianartunngorlugu
Silaannaap allanngornerani eqqungaasut quianartunngorlugit.
Taama naatsigisumik oqaasertalerneqarpoq aliikkutassiaq ”Nunarsuup kissatsikkiartornerani eqqungaanikut”.
Taannna takutinneqassaaq Sisimiuni kulturip illorsuani sapaat februaarip 13-iat, tassani nalunaaquttap akunnera ataaseq sinnilaarlugu atorlugu Piitannguaq Alaufesen aamma Sikkersoq Mathæussen quiasaarissapput takutitassiat naatsut atorlugit nipilersukkanillu Ane Johanne og Gert Jeremiassen akunniliisassapput.
- Takutitassat imaat sorpiaanersut oqaatigineqarusunngillat, Sisimiormiunut aatsaavissuaq takutinneqassammata. Sikkersoq Mathæussen Ilulissani ilisarisimaneqalereersoq Sisimiormiut takornassavaat qularnanngivissumillu inuit taakku quianaqisut marluk illartitsilluarumaarput - meeqqanit minnernit utoqqarnut, taama Taseralimmiit nalunaarput.
Piitannguaq Alaufesen Sisimiuni ilisimaneqarluareerpoq tassani ukiorpaaluit matuma siorna quiasaarillammattut ilisimaneqalerami.
