Silaannaap allanngornera Kinami kinguneqartoq
Silaannaap allanngoriartornerat akingunerisaanik Kinami koorujussuit aallaaviisa ilaat Kuussuaq Sungaartoq-mik atilik imaarukkiartulersimavoq.
Tamannalu kuussuup sinaani najugaqartut katillutik 120 millionet inuuniarnikkut annertuumik eqqugaanerannik kinguneqartoq, aviisimi Informationemi allaaserineqarpoq.
Kuussuaq Sungaartoq, nunarsuarmi koorujussuit soorlu amerika kujallermi Amazonassimut, kangianilu qiterlermi Nilen-imut angissutsimigut takissutsimigullu assersuunneqartartoq, nunarsuarmilu kuunnit tamanit atorluarneqarnerpaatut nalunaarsungaasoq, paqqeriartulersimavoq qatsissumi qaqqarsuaqarfimmi Himalayani, kuussuup aallaavigisaani silaannaaq allanngoriartupiloormat.
Oqaatigineqarpoq Kina kuussuup taassuma sineriaani ukiut 6000-it matuma siornagut inoqaleqqaarsimasoq.
Kuussuaq imaarutissappat inuppassuit narsaaterpassuit uumasorpassuillu imissaatissapput erngullu nukissiorfippassui suliffissuaqarfiillu allat unerassallutik.
Kuussuaq imaarukkiartulermat kiannerulerpoq, tatsit imaarutsiterput kiannerulermallu nuna qeriuaannartoq aakkiartulerpoq qaqqallu aputaajuitsut allaat aputaartitilersimasut Green Peacep Himalayani aasaq misissuiartortitai taama nalunaarusiorput.
Silaannaap allanngoriartornerata kingunerisaanik inuuniarnikkut eqqugaasut 50.000 qimarngusutut inissismalersimasut Green Peace nalunaarusiamini saqqummiussivoq.
