Silaannaap allanngoriartorneranut "Aanaakkut Aataakkut" suliniuteqalerput
Norgimi naalakkersuisut gassimik CO2-mik aniatitsineq minnerulersinniarlugu inuiaqatigiit tamarmik ilaaffigisassaanik paasisitsiniaaniarput.
Norgimi suliffeqarfiit, peqatigiiffiit aamma pisortat oqartussaaffii silaannaap kiatsikkaluttuinnarneranut iliuuseqarniarluni paasisitsiniaanermut tamarmik peqataassapput, tamannalu naalakkersuisunit marlunngormat aallartinneqarpoq.
Peqataasut ilagissavaat utoqqaat “Aataat aanaallu peqatigiiffianni” ilaasortat.
- Kinguaariinni uagut akisussaasuuvugut, Anne Skranefjell peqatigiiffimmeersoq oqarpoq.
- Taamaattumik qanoq iliuuseqartariaqarpugut, Skranefjell oqarpoq.
Paasisitsiniaaneq inuiaqatigiinnut tamanut tunngatinneqarpoq – ilaqutariit atuinerannut, suliffeqarfinnut, kommuninut inuiaqatigiillu ingerlataannut allanut.
Norgimiut avatangiisinut ministeriat Helen Bjørnøy, nassuiaavoq, paasisitsiniaaneq silaannaap pissusaanut avatangiisinullu pitsaanerulersitsissasoq.