Silaannaap allanngoriartornera suleqatigiissutigisariaqarparput

maajip 18-at 2006 07:37

Nunat inuiinut Naalagaaffiit Peqatigiit suliniaqatigiiffiata, Permanent Forumip, New Yorkimi tallimassaa ataatsimiinneranni nunatta peqataatitaasa ilaat nunarput sinnerlugu ippassaq oqalugiarpoq.

Oqalugiartoq tassaavoq Inatsisartut Nunanut Allanut Sillimaniarnermullu Ataatsimiititaliaata siulittaasua, Johan Lund Olsen.

Silaannaap allanngoriartornera issittumi nunap inoqqaavinut sunniuteqalereersoq Johan Lund Olsenip maluginiaqquaa, unammilligassallu annertunerujussuarmik nunarsuarmi inuiaqatigiinnit suleqatigiiffiunerunissaat kaammattuutigalugu.

Issittumi Siunnersuisoqatigiit nunallu inooqqaavisa akornanni issittumi nunap inoqqaavisa inuuniarnikkut atugaasa misissuiffigineqarnerat eqqaaneqarpoq.

Nunatta Danmarkillu akornanni nammineernerulernissamik isumaqatigiinniarnerit ingerlanneqartut Johan Lund Olsenip taakkartugaannut ilaapput, tassungalu atatillugu nunarput sinnerlugu oqalugiartup taavaa nammineernerulernissamut inuit nammineq aalajangiisinnaatitaanerisa piviusunngortinniarneqarnerat siumut alloriarnerusoq.