Silaannaap allanngoriartornera pillugu København-imi ataatsimeersuarneq

Allattoq Jaaku Lyberth
maajip 03-at 2007 10:40

Silaannaq pissusaanik FN´s ataatsimeersuartitsinissaa Københavnimi novemberip 30-ianiit decemberip aqqarngata missaani ingerlannqartussaq piareersarneqaleruttorpoq.

Ataatsimeersuarnermi Issittumi silaannaap allanngoriartornera immikkut eqqartorneqarnissaa maanna piareersarneqarpoq. Piareersaatillugu DMI-mi ilisimatusartunut soqutiginnittulunnu allanut 80-inut ullumi saqqummiunneqarput.

Ataatsimeersuartitsinissamik aaqqissueqataasoq Morten Skovgaard Olsen, avatangiisit pillugit ministeriaqarfimmeersoq raadiuaviisimut oqarpoq issittumi silaannaap allanngoriartornerata avatangiisimut sunniutai ataatsimeersuarnermi ersersinniarneqassasut. Kalaallit Nunaanni issittullu sinnerani kilaannaap kissakkiartornerata sunniutai saqqummiunneqassapput. Minnerunngitsumillu kissakkiartornerup nunarsuarmut aamma sunniutai ersersinneqassapput. - Kalaallit Nunaata kisimi iluaqutigissanngilaa aammali nunarsuup sinnerata saqqummiinissaq pissarsiffigissavaat, Morten Skovgaard Olsen oqarpoq.

- Aap soorunami piniartut ataasiakkaat silaannaap kissakkiartorneranik eqqorneqarnerat aamma kalaallit inuiaqatigiittut eqqorneqarnerat ilisimaneqarpoq, paaserusunneqartullu ilagaat immarsuup sarfaasa ingerlaarnerat kissakkiartornerup kingunerisaanik allannguuteqarnersut, qanorlu tamanna aalisartunut sunniuteqarnersoq, Morten Skovgaard Olsen raadiuaviisimut oqarpoq.

Avatangiiseq pillugu ministeriaqarfiup ilimagaa ministerit 170-it missaanni ataatsimeersuarnermi peqataassasut, taakku saniatigut atorfilittat nunanillu allanit peqataatitat kiisalu inuussutissarsiornermeersut inuit 8000-it FN-ip silaannaap allanngoriartornera pillugu ataatsimeersuartitsineranut peqataasssapput.