Sila pissutaalluni angallanneq unitsinneqarpoq
Avannamik anorersuarpoq, ullussaarsuartullu sakkortutigisumik anoraasuartarluni, nittaalluni imaliliorluni siallerluni pivoq, tamatuma kingunerisaanik Savalimmiuni nunaqarfiit akornanni angallanneq politiinit innersuussutigineqanngilaq.
Aqquserngit arlallit aputeqarpallaarnera pissutigalugu angallavigineqarsinnaanngillat. Innaallagissap aqqutai aputinit ajoquserneqarlutik innaaligeriaarutitsipput, ilaatigut sivisujaamik innaalliaqassanani.
Angallatit ilaasartaatit tamarmik angalajunnaarput, timmisartullu Savalimmiunut Savalimmiuniillu angalasussat tamarmik taamaatinneqarlutik.
Biilit arlalippassuit anorersuarneratigut aqquserngup sinaanut teqqaatinneqarsimapput, inunnilli ajoqusertoqarsimanngitsoq nalunaarutigineqarluni.
Anorersuarnera unnuamut ingerlaannarnissaa aarlerisaarutigineqarpoq, tamatumalu kingorna issilissalluni.