Sila pissusaa pillugu ataatsimeersuarneq imakilliorpoq

- Naalagaaffiit Peqatigiit suleriaasaat soorunami ataqqineqassaaq, isumaqatiginninniarnerilli arriippallaamik ingerlanneqartut takusinnaavara. Bonnimi ataatsimiinnermi isumaqatigiinninniutissap allassimanera taamaallaat atuarlugu angumeraarput. Tamatumunnga tapugullugu isumaqatiginninniarluni oqaaseqaatit quppernernut 200-nut amerlisimapput, tamannalu ajuusaarnarpoq, tassami Bonnimi ataatsimiilluta aallartikkatta inaarutaasumik allakkiatsinni illuatungeriit tamarmik isumaqataaffigisaat pingaarnertut sammisimagaluaratsigik, silap pissusaanut ministeri Connie Hedegaard oqarpoq.

Taamaattumik taassuma kaammattuutigaa sila pillugu Københavnimi ataatsimeersuannginnermi politikerit akulikinnerusumik ataatsimiittassasut, tassanimi sila pillugu nunat tamat akornanni isumaqatigiissut nutaaq piareeqqasussaammat. Ilulissanilu qaammammi matumani ataatsimiittoqassaaq, tassani nunarsuatsinni naalakkersuisut amerlasuut Kalaallit Nunaanni Oqaloqatigiinnermik taasami peqataasussaapput.

Michael Pedersen, sila pillugu kiisalu attaveqaqatigiinneq pillugu aqutsisoqarfimmi pisortaq Nunatsinnit peqataavoq.