Sila pillugu suleriaasissaq akueraat
EU-mi CO2-mik aniatitsineq ukioq 2020 tikitsinnagu 20 procentimik millissasoq aalajangiunneqarpoq, soorluttaaq nukissiuutinik ataavartunik pilersitsiortorneq, nukissiuuteqarnermut aningaasartuutit tamarmiusut tallimararterutaaleqquneqartoq.
Sila pillugu Polenimi sapaatip-akunnera kingulleq ataatsimeersuarnermi isumaqatigiissutissaq assortuussutaavoq, pingaartumik suliffissuarnik ingerlatsisut CO2-mik aniatitsinerusariaqarnertik pinngitsoorsinnaasanngimmassuk aamma nunanut ineriartortitanut tapiissuteqarnerni nunap nammineq sila pillugu naatsorsuutiminut ilanngussisarnerat periarfissaanerulersimammat.
Avatangiisinik illersuiniat arlallit oqariartuutigigaluarpaat sila pillugu isumaqatigiissutissap EU-p siuttuisa atsioqataaffigissanngikkaat. Tamannali tusaanagu sila pillugu EU-mi suliniuteqarnissaq amerlanerussuteqartut maanna atsiorpaat.
