Sila pillugu saqqummersitsineq Kuupik Kleistip Kunngissallu ullumi ammarpaat

Saqqummersitsineq Namminersorlutik Oqartussanit aaqqissuunneqarpoq tassanilu sammineqarluni sila pillugu akisussaaneq suliffissuaqarnikkullu ineriartorneq. Rasmus Lyberth Band aatsaat tusarteqqaakkaminnik ammaapput:
decembarip 11-at 2009 16:16

Rasmus Lyberthikkut nipilersugaata nipitaasigut Kunngikkutullu ataqqinassusilik Kungissaq Frederik saarlerpaani issiatillugu Namminersorlutik Oqartussat sila pillugu ataatsimeersuarnermut aaqqissuussinertik ammarpaat. Kuupik Kleist ima tikilluaqqusivoq:

- Nuannaarutigeqaara Kalaallit Nunaanni Namminersorlutik Oqartussat aaqqissuussinerannut In the Eye of Climate Change-mut tikilluaqqusinnaagassi. Saqqummersitsinermi matumani siunertaavoq ullut ikittunnguit atorlugit nunarsuarmiut Københavnimi katersortissallugit taakkualu ullumikkut Kalaallit Nunaannik soqutiginnilersissallugit, taama Kuupik Kleist oqarpoq.

Kunngissap Kalaallit Nunaanni angalaarajuttup silap allanngoriartornera siooranartorsiortitsigaluartoq innuttaasut neriuuteqartuarnissaannik kajumissaarpai:

Annilaanganngilanga, neriuppungalu isumalluarnerput neriuuteqarnerpullu pigiinnassagipput imaanngitsoq annilaangassasugut siumullu eqqartuussinermik takorluuissasugut, soorunami aamma sila allanngoriartussaaq kalaallinilu inuiaqatigiinni allanngoriartortoqassalluni. Kalaallimmi inuiaqatigiit ukiuni tuusintilikkuutaani allannguuteqartarnernut piareersimallutik takutereersimavaat, pinngortitamilu ukiut silallu allannguutai takkuttartut, aammattaarli qularnanngitsumik takkuttartussat malittaralugit.

Illit nammineq Kalaallit Nunaanneeqqammerputit, taajakkua taavaniinninni silap allanngoriartornera qanoq misigisimavaat?

- Takoreersimanngisannik takusaqanngilanga, tassa silap allanngoriartornera uanga silarsuanni allamut tunngassuteqarpoq, kisiannili tikillugit nuannerpoq tassaammata kalaallit Kalaallit Nunaanni najugaqartut immikkut atassuteqartut, tassalu inuiaat ukiuni tuusintilinni najugaqarsimasut allannguuteqarnissamullu piareersimasut soorlu Sarfannguani suliassatut pilersaarutit nunaqarfinni saqqumilaartitat. Tamanna aamma assersuutissaalluarpoq nunap issittup qanoq atorneqarsinaaneranut, tassa neriuutissaqarluarpoq.

Saqqummersitsineq In the Eye of Climate Change Illu Atlantikumi 20. december tikillugu takuniarneqarsinnaavoq.