Sila pillugu politikkissaq piareersarneqaleruttorpoq

Naalakkersuisut silap pissusaata allanngoriartorneranut atatillugu politikkissaanut attuumassuteqartut Attaveqarnermut Avatangiisinullu Naalakkersuisoqarfiup ataani Avatangiisinut Aqutsisoqarfimmi suliarineqaleruttorput.
Allattoq Najaaraq Egede
maajip 17-at 2008 17:09

Nunatta Kyoto-mi isumaqatigiissut naapertorlugu pisussaaffiinut tunngatillugu taamaaliortoqarpoq, tassami nunarput 2012 tikitsinnagu CO2-mik aniatitsinerminik ukiumut 8 procentimik annikilliliisarnissaminik pisussaaffeqarpoq.

Pisussaaffiit piviusunngortitsinissaat nunatta aningaasarsiorneranut malunnaatilimmik kalluaariaannaanerat pillugu ilisimatitsissut, Naalakkersuisunut ulluni qaninnerni saqqummiunneqartussaassavoq.

Kyoto-mi isumaqatigiissut København-imi silap pissusaa pillugu aappaagu ataatsimeersuartoqarnerani nutarterneqartussaavoq.

Ataatsimeersuarnermi tassani nunatta soqutigisaasa immikkut ilanngunneqarsinnaanerat qulakkeerniarlugu iliuusissanut tunngassuteqartut Inatsisartut Eqqissisimatitsinermut Avatangiisinullu Ataatsimiititaliaanut aamma ilisimatitsissutigineqarput.

Avatangiisinut Aqutsisoqarfiup ilisimatitsissutigaattaaq, silap pissusaata allanngoriartorneranut tunngassuteqartunik suliallit ilaneqarsinnaanerat maanna sulissutigineqartoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq