Sila pillugu oqallinnerup nunarput soqutigineqalersippaa

Nunanit allanit takornariartitsisartut issittoq soqutigilluinnalerpaat taamaanneranullu nassuiaatit ilagaat sila pillugu oqallinnerit.

Ukiorpanngortuni nunatsinni takornariartitsisartut tyskit, qallunaat Japanimiullu ukiorpanngortuni sullittarpaat. Maanna aamma russit nunarsuarmi qeqertat annersaannut soqutiginnilerput.

Nunatsinni takornariartitsinermut inuussutissarsiornermullu siunnersuisooqatigiit GTE takornariartitsivinnut tuniniaasartunik tikeraartitsilerpoq. Nunat Avannarliit Killiit takornariaqarneq pillugu nuisitsineranni Vestnorden Travel Mart sapaatip akunnera tulleq Savalimmiuni pisussaq naammassippat tuniniaasartut Kangerlussuarmut Ilulissanullu tikeraartinniarpaat.

- Rusland niuerfiuvoq nutaaq soqutiginaatilerujussuaq, GTE-mi siunnersorti Lykke Geisler Yakaboylu KNRimut oqarpoq.

Tuniniaasartunik siornatigut GTE tikeraartitsisareerpoq Vestnorden Travel Mart naammassigaangat pisartumik. Tuniniaasartut siornatigut nunatsinniissimanngitsut tikeraartinneqartarput taamaasilluni niuerfissat nutaat pissarsiariniarlugit.

Tikeraarniarlutik nalunaartut tassaapput Rumæniamiut, russit, Belgiamiut, tuluit, Australiamiut, Islandimiut aamma USA-meersut.

- Qularutiginagu oqaatigisinnaavarput silaannaap allanngoriartornera pillugu oqallinnerup issittumut soqutiginninneq annertusitissimagaa. Nunarsuaq tamakkipajaarlugu issittumut maanna soqutiginnittoqarpoq, Lykke Geisler Yakaboylo oqarpoq.

GTE-mit suli oqaatigiuminaatsinneqarpoq tuniniaasartunik tikeraartitsineq takornarianik amerlanerusunik kinguneqarumaarnersoq.

- Kisianni tassa Kalaallit Nunaanniissimanngitsunut tamaanga takornariartitsinissaq tuniniaruminaatsorujussuuvoq. Taamaattumik isumaqarpugut pingaartorujussuusoq tuniniaasartunik tikeraartitsisarneq, Lykke Geisler Yakaboylu oqarpoq.

Tuniniaasartut maanna Kangerlussuarmiitinneqassapput nunaqarfillu taanna mittarfeqarfiutigisoq tikeraareerunikkut Ilulissanukassapput takornariat alutorilluartagaannut Eqimut Oqaatsunullu takusaatinneqassallutik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat