Sila pillugu Nunarput Danmarkilu isumaqatigiissuteqangajalersut
Silap pissusaa pillugu ataatsimeersuartoqareermat maanna nunarsuarmi politikkikkut siuttut isumaqatiginnialeruttorput. Kalaallit Nunaata Danmarkillu isumaqatiginniarnerat ullaaq manna nalunaaqutaq qulinut aallartippoq ullullu ingerlanerani isumaqatigiittoqariaannaavoq.
Allattoq Bikki P. Kleist
- Lykke Friis ataatsimeeqatigereerukku neriuppunga nalunaaqutaq pingasut qaangernerani isumaqatiginniarneq pillugu oqaaseqarsinnaassallunga, Naalakkersuisut siulittaasuat, Kuupik Kleist Bella Centerimiittoq KNR-mut oqarpoq.
Lykke Friisimik ataatsimeeqateqarneq Nunatta nalunaaqutaa malillugu nalunaaqutaq qulinut aallartippoq.
Kuupik Kleistip aamma neriuutigaa, Qallunaat Nunaannut ullumi isumaqatigiissuteqarsinnaassallutik. Kalaallit Nunaannit silap pissusaa pillugu ataatsimeersuariarnermut aallartitat maannamut suli oqaaseqarneq ajorput.