Sikup umiarsuaq pajuttoq tikissinnaajunnaarsippaa
Suli nalunarallarpoq qaqugu Royal Arctic Linep umiarsua Tasiilap umiarsualivianut tulassinnaalissanersoq. Umiarsuaatileqatigiit ullumi paasivaat Tasiilamut ingerlaarnissamut suli sikoqarpallaartoq.
- Tasiilami umiarsualivik suli issusuumik sikoqarpoq, meteri ataaseq tikillugu issussuseqartumik. Tamaanilu kutterit arlallit ukiup sikuani suli sikkussaasimapput, kiisalu taakku aatsaat umiarsualivimmit anillassinnaalerpata Royal Arctic Line talittarfimmut tulassinnaalissaaq, Royal Arctic Line taama nalunaarpoq.
Tasiilap avataani aamma imartami 25 kilometerisut annertutigisumi sikorsuaqarpoq umiarsuamit ingerlavigineqarsinnaanngitsunik.