Sikup Sinaavanit Eqqumiitsuliat

Eqqumiitsuliorneq sorpassuarnik imaqarsinnaavoq tamannalu assigiinngeqisunik eqqumiitsuliortut immersortarpaat. Eqqumiitsuliat eqqumiitsuliortut 'Norden Rundt - Sikup Sinaavanit Eqqumiitsuliat' inuusuttunut sammitinneqarlutik suliaapput. Nuummi saqqummersitsinermi periarfissaqarpoq nunani peqataasuni eqqumiitsulioriaaseq takuneqarsinnaavoq aammalu eqqumiitsuliortunngorusussinnaasunut isumassarsiorfigineqarsinnaalluni.

- Nunani Avannarlerni eqqumiitsuliornermik ilinniarfiit tallimat – nuna aggerfik aallaavigalugu containerip iluatungaani eqqumiitsulialiorsinnaanersut aperaavut. Taamaalilluni nunani avannarlerni  inuusuttut eqqumiitsuliaat piviusunngorsinnaalerpoq! Neriuppunga inuusuttut tikeraat nunaqavissullu eqqumiitsulioriaatsinik atorsimasaminnik isumassarsiffeqarlutillu paarlaateqatigiissinnaajumaartut, NAPAmi pisortaq Leise Johnsen oqarpoq.

Nalliuttorsiorneq malunnartinniarlugu NAPAp eqqumiitsuliortut inuusuttut Islandimiit, Finlandimiit, Savalimmiuniit Ålandillu qeqertaaniit Nuummut tikeraarsarsimavai. Tassani kalaallit inuusuttaat workshopimi sammisaqarnermi naapissavaat atillu najoqqutaralugit eqqumiitsuliamik suliaqassallutik. Isumassarsiami qitiuvoq meeqqap atiata allat atiinut akuliunnissaa taamaasilluni nunani avannarlerni oqaatsit, immikkuullarissuseq oqaluttuarisaanerlu malunnarsitiniarlugit. Tamanna pissaaq saapaammi nalunaaqutaq quliniit tallimat tungaannut.

- Pingaartorujussuuvoq nunatsinni inuusuttut naapeqatigiississallugit, aamma Nunanit Avannarlerneersunik tikeraartoqartilluta, taamaalillutimmi sammisatigut naapinnikkullu ilikkagaqassammata. Tamannarpiaavorlu Nunat Avannarliit suleqatigiinneranni qitiusoq, Leise Johnsen erseqqissaavoq.

Eqqumiitsuliaq Katuami septemberip sisamaata tungaanut takuniarneqarsinnaavoq containerinillu saqqummersitsineq septemberip qulingiluaata tungaanut takuniarneqarsinnaavoq. Tamatuma kingorna nunani avannarlerni allani takutinneqassaaq kingusinnerusukkullu nunatta sinnerani takutinneqassalluni.