Sikup aakkiartornera ilisimatusarfigineqassamaarpoq
Issittumi Siunnersuisoqatigiit 2013-imiit 2015-ip tungaanut Canadamit siulittaasuuffigineqalersussaanerat ilutigalugu Canada pilersaarummut aalajangeeqataalluinnartussaavoq, tassami Canadap siulittaasuuffia naappat ilisimatusarneq naammassisussaassammat.
Issittumi Siunnersuisoqatigiit Nunatsinni ataatsimiinnissaannut pilersaarusiornermut atatillugu Norgemi oqartussat pisortaat Karsten Klepsvik sapaatip akunnerani kingullermi Ottawamiippoq. Pilersaarusiornerup kingorna Karsten Klepsvik Canadian Pressimut oqarpoq 2015 qaangiutinngitsoq silap pissusaata allanngoriartorneranut pissutaasinnaasunik tutsuiginarluinnartunik taamanikkumut paasisaqarsinnaakutsoortoqartoq.
- Issittumi Siunnersuisoqatigiit inerniliussaasa ilagissajunnarsivaat sikup aakkiartornera sukkanerujussuarmik pisoq, tassami tamanna maannakkumut takusinnaalereeratsigu, aamma taamaattoqarneratigut arlaannik annertuumik kinguneqartitsisinnaasoqarluarmat, Karsten Klepsvik oqarpoq.
Issittumi Siunnersuisoqatigiit ilisimatusartitsineranni paasiniarneqassapput siku, sermit iigartartut aamma nuna qeriuaannartoq.
- Silalli pissusaata allanngoriartornera ajortuinnaassagunanngilaq, tassami periarfissarpassuit allat pilersussaassapput, soorlu aalisakkanik aamma uulia gassilu eqqarsaatigalugit niueqatigiinnerit, Karsten Klepsvik oqarpoq.
Ilisimatusarnissamik pilersaarutip nalunaarutigineqarnera pissaaq issittumi siunnersuisoqatigiit maajimi Nunatsinni ataatsimiinneranni. Tassani peqataassallutik nunani issittuni arfineq-pingasuusuni nunanut allanut ministerit.
