Assi: Diplom-Is-ip ukiuni kingullerni 90-ini ilisarnaatigisimasaa. Assi: Diplom-Is

Sikunik nioqqutissiortup Diplom-Is-ip oqaaseq Eskimonika atorunnaaraa

Norgemi sikunik nioqqutissiorfiup ukiuni 90-ini ilisarnaatigisani allanngortippaa.

Norgemi sikunik nioqqutissiorfiup, Diplom-Is-ip, ukiuni 90-ini ilisarnaataa qungujulasumik Inummik sungaartumik annoraalimmik inuttaqarpoq.

Ilisarnaatinili allanngortippaa. Norskit nutaarsiassaqartitsiviat NRK taama allappoq. 

Ilisarnaataata inuttaa "Eskimonika"-mik ateqarunnaarluni "Diplom-Is Jenta"-mik ateqalerpoq. 

Nutaamik ilisarnaateqalernissaa sivisuumik sulissutigisimagitsik, aammali oqaaseq "eskimo" pillugu oqallinneq arajutsisimanngikkitsik, Diplom-IS-ip nittarsaassinermi pisortaa Anne Borgen Sturød NRK-mut oqarpoq. 

AAMMA ATUARUK Sikunik nioqqutissiortup Hansens Is-ip sikuliani Eskimo allamik atseraa

- Ilisarnaaterput kalaallinut ilaatigut attuumassuteqartikkunnaarusullugu allanngortipparput, Anne Borgen Sturød NRK-mut oqarpoq. 

Diplom-Is-ip Danmarkimi sikunik nioqqutissiorfik Hansen Is taamaalilluni peruaa. Hansen Is-immi sukuliami valijemik solbærillu simersianik akullip sukkulaamillu qallikkap atia aasaq allanngortippaa. 

Hansenip sukuliani O´Payo-mik atseraa

Pisisartorpassuit sukuliorfimmut naammagittaalliuteqareersullu taamaaliorpoq, pisisartorpassuammi isumaqaramik atia ammip qalipaataanik assigiinngisitsinertut isigineqarsinnaasoq.

Hansens Is-ip siku taanna O`Payo-mik atserpaa, sukkulaamut qalliutaasumut atsiullugu.

- Ima misigaagut: Ila arraa sikuinnaavoq. Atia mamiasuutigineqarpat ammillu qalipaataa tunngavigalugu assigiinngisitsinertut misinnartinneqarpat allamik atsernissaa soorunami pissusissamisoorpoq, tuniniaanermut pisortaq Anders Eibye KNR-imut juulimi oqarpoq. 

AAMMA ATUARUK Siku pillugu: Atiata allanngortinneqarnera ajunngilaq, eskimoli aamma ajorisassaanani

Danmarkimi oqaatsit pillugit aalajangiisartut oqaaseq Eskimo ammip qalipaataanik assigiinngisitsinertut isigineqarsinnaasutut nalilermassulli, sikup taassuma Eskimomik ateqarnera Danmarkimi siusinnerusukkut oqallisaavoq.

Sikunik nioqqutissiortup allap, Friskop, sikuliaata ilaat  'Eskimomik' aamma ateqarpoq. Sikulli aqqa Friskomit akarnaatsutut misigisimanartinneqanngitsoq, Unileverimi Friskomik piginnittumi tusagassiinermik akisussaasuusoq Sandhya Forselius juunimi oqarpoq.

Amerikamili sikunik nioqqutissiorfiup Dreyer´s Grand Ice Creamip sukuliani "Eskimo Pie"-p aqqa ukiup naanerani allanngortissavaa. Sikuliaa taanna Eskimo Piesimik 1920-mili ateqarpoq. 

Politikerit akuliuttut

IA-millu Folketingimi ilaasortaq, Aaja Chemnitz Larsen, sikup Eskimomik ateqarunnaarsinneqarnissaa pillugu oqalliseqataangaatsiarpoq.

Oqaasermi eskimo isumaqarpoq neqituumasoq, taamaammat nikassaarpasissuusinnaasartoq, taanna juulimi oqarpoq.

AAMMA ATUARUK Aaja Chemnitz sikunik nioqqutissiortunut: Oqaaseq eskimo atorunnaarsiuk

Taamaammat kalaallit ilarpassui "eskimo"-mik taaneqaratik "inuit"-mik taaneqarusunnerusartut, Aaja Chemnitz Larsen taamani oqarpoq.

- Taaguut "inuit" naggueqatigiittut kinaassuserput eqqarsaatigalugu allatorujussuaq tamakkiinerusumillu ersersitsivoq. Neqituumasuinnaanngilagummi, kinaassutsitsigummi allarpassuarnik aamma pissuseqarpugut, Aaja Chemnitz Larsen taamani oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat