- Inuit ilaat ima isummerput: Allamik atserneqarnera sianilluanngitsuliorneruvoq. Siku Eskimomik ateqartuaannarnikuuvoq, sooq taama ateqaannassanngila? Politikkikkut ileqqorissaarnerup aqqani qujanarniartutut isornartorsiorneqarpugut. Allalli aamma isumaqarput, allamik atsiinerput sapiitsuliornerusut, Hansens Is-ip tuniniaanermut pisortaa Anders Eibye oqarpoq. Assi: KNR

Sikunik nioqqutissiortoq: Kalaallit isumaat pingaartittupilussuuagut

Sikunik nioqqutissiortup Hansens Is-ip sikuliani Eskimo allamik atserpaa. Ilisimasavut killeqarsimagunarput. Tuniniaanermut pisortaq taama oqarpoq.

- Ateq Eskimo eqqaakulunnermut attuumassuteqartipparput, sikullu taama ateqarnerata ajornartorsiutaasinnaaneranut ilisimasavaut killeqarsimagunarput.

Sukuliorfiup Hansens Is-ip tuniniaanermut pisortaa, Anders Eibye Hansen, KNR-imut taama oqarpoq. Sukuliorfiummi Hansens Is-ip sikuliani mamarineqarluartoq vaniljemik akulik sukkulaamillu qallersimasoq ullumikkut marlunngornermi allamik atserpaa. 

AAMMA ATUARUK Sikunik nioqqutissiortup Hansens Is-ip sikuliani Eskimo allamik atseraa

- Kalaallinit attavigineqartarpugut, taakkualu sikup allamik atserneqarnissaa pingaaruteqartupilussuunerartarpaat. Isumaallu tusarnissaat pingaartittupilussuuarput. Tassami Danmarkimi hr. aamma fru Jensenikkuunngitsut - kisianni ingammik kalaallit Issittormiullu allat isumaat sikuliatta allamik atserneranut sunniuteqarput, Anders Eibye oqarpoq.

Eskimo ammip qalipaataat tunngavigalugu assigiinngisitsinertut nalilerneqarsinnaasartoq

Hansens Is-ip sikuliani taanna O’Payo-mik atserpaa, sukkulaamut qalliutaasumut atsiullugu.

Danmarkimi oqaatsit pillugit aalajangiisartut oqaaseq Eskimo ammip qalipaataa tunngavigalugu assigiinngitsinertut isigineqarsinnaasutut nalilermassulli, sikup taassuma Eskimomik ateqarnera Danmarkimi oqallisaavoq.

Sikunik nioqqutissiortup allap, Friskop, sikuliaata ilaat  'Eskimomik' aamma ateqarpoq. Sikulli aqqa Friskomit akarnaatsutut misigisimanartinneqanngitsoq, Unileverimi Friskomik piginnittumi tusagassiinermik akisussaasuusoq Sandhya Forselius juunimi oqarpoq.

AAMMA ATUARUK Sikunik nioqqutissiortoq sikuliami aqqanik Eskimotalimmik allannguinissaminut nangaasoq

Amerikamili sikunik nioqqutissiortup Dreyer's Grand Ice Cream-ip sikuliamik ilaat Eskimo Pies ukiup naanerani allamik aamma atsissavaa. Siku taanna 1920-mili nioqqutissiarilerpaa.

- Sikuliatta atia oqaatsillu Eskimop isumaa eqqarsaatigillualerpavut. Aqqa Eskimotaqarnera inuit ilaannut ajornartorsiutaasinnaavoq, tamannalu isumaliutigalutigullu iliuuseqarfigaarput, tuniniaanermut pisortaq Anders Eibye oqarpoq. 

Ila arraa, sikuinnaavoq

-  Sikuliatta aqqa pillugu isummanik kingullertigut apuussivigineqakulavugut. Tamanna qularnanngitsumik Black Lives Matterimik taallugit kingullertigut akerliussutsimik takutitsisoqaqattaarneranik ammillu qalipaataannik inuiannillu ikinnerussuteqartunik assigiinngisitsinermut akiuinermik ukkassisoqarneranik peqquteqarput. 

- Ima misigaagut: Ila arraa sikuinnaavoq. Atia mamiasuutigineqarpat ammillu qalipaataa tunngavigalugu assigiinngitsinertut misinnartinneqarpat allamik atsernissaa soorunami pissusissamisoorpoq. 

Hansens Is-ip sikuliaminut Eskimomut poortuutissat nunguppata allamik atsissavaa. 
 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat