Sikunik ilisimasalik alapernaarsuummut iluaqutaavoq

Sikut pillugit siunnersuisartoq siulleq tassaavoq Jens Jakobsen, suliassaasalu pingaarnersaraat umiarsuaq alapernaarsuut issittup imaani imartami sikoqartaqisumi aqqutissiuullugu sumiissusersiussalluni. Suliassamini Københavnimi suleqatiminit DMI-minnganneersunit ikiorneqassaaq, tamatumanilu paasissutissat nalinginnaasumik amerlaneroqisut pissarsiarineqarnissaat periarfissaqalerluni.

Hvidbjørnenip naalagaa, kommandørkaptajn Peter Schinkel Stamp, sakkutuut imarsiortut tusagassiortunut immikkoortortaqarfiannut oqarpoq sikut pillugit siunnersuisartoq assut iluaqutigilereersimagitsik.

- Siunnersuisartup nunap immalluunniit assiutaasa paasitippaatigut imaannarmut ingerlanissarput toqqassagipput. Taamaattumillu orsussaq ingerlatissaq sipaarparput, umiarsuup naalagaa oqarpoq.

Taassuma aamma sikut pillugit siunnersuisartumik ilaatitaqarnermi periarfissat annertuut malugai.

- Silap kissarnerulernera sakkutuunik imarsiortunik suliassaqarnerulersitsivoq. Sikup aakkiartornera arlalippassuartigut ajornartorsiutissaqalersitsivoq, nunarsuulli kissatsikkiartornera arlaatigut pitsaaquteqarsinnaalluni. Sullualukkut aqqut qaninneq umiarsuarnut niuffagiutinut angisoorsuarnut aningaasanik orsussamillu sipaarutaasinnaavoq. Tamatumanilu sikut pillugit siunnersuisartoq iluaqutaasumik ikiuussinnaavoq, umiarsuup naalagaa Peter Schinkel Stamp oqarpoq.