Sikunik aserorterut USA-mut uterpoq
Amerikamiut umiarsuaataat sikunik aserorterut ”Healy” marsip qaammataaniit aallartittumik Issittumut angalaareerluni, Seattle-imut, Washingtonimiittumut, ullumi tikissaaq. The Seattle Times taama allaaserinnippoq.
Allattoq Louise M. Kleemann
oktobarip 15-at 2008 12:53
Ilisimatuut assigiinngitsut 50-it umiarsuarmut ilaapput, qaammatinilu kingullerni sisamani immap naqqanik misissuisoqarluni.
Beringip Imartaa Issittullu imartaa misissuivigineqarput, immallu naqqata nunavimmut atanera misissuivigineqarluni.
Uumassusillit ataqatigiiaarnerat umiarsuup angalaarnerani pingaarnertut aamma misissorneqarput.
“Healy” 120 meterit sinnerlugit takissuseqarpoq, USA-llu sikunik aserorterutaataanni nutaanersaallunilu annersaalluni.
Taanna amutsivimmut maanna amuneqassaaq, aappaagumut piareersaatitut iluarsartuunneqassalluni.
Angalanermi paasisarpassuit sukumiinerusumik maanna misissorneqassapput, kingusinnerusukkullu saqqummiunneqarumaarlutik.
