Sikumik aserorterussuit annersaat sananeqalerpoq
Sikusiussuaq ”Aurora Borealis” 65.000 tonsiusussaq, taamaalilluni russit maanna sikusiussuaataannit annerpaamit marloriaammik anginerussalluni. Ima atortorissaartigissaaq, allaat qillerivissualerneqassalluni imaq 5 kilometerisut ititigisoq immallu naqqa kilometeri ataaseq tikillugu ititigisoq qilleriffigisinnaassallugu.
Sikusiussuup titartagartai Finlandimi umiarsualiorfimmi Wärtsilä-mi piareersarneqaleruttorput.
Sikusiussuaq taanna naammassiguni issittup imartaani sikunik aserorterutinit ikiorserneqanngikkaluarluni misissuiviusinnaassaaq.
Umiarsuaq naqqatigut marlunnik aamma imaanut aqqarfissalerneqassaaq, ilisimatusartut silamut aneqqaanngikkaluarlutik aqqartartut assaasarsuallit ungasianit aquttakkat atorlugit misissugassanik qalluisinnaanngussammata.
Pilersaarutit malillugit sikusiussuaq 6,5 milliardi koruuninik akeqassangatinneqartoq 2012-imi sanallugu aallartinneqassaaq 2014-imilu angalaqqaartinneqassagunarluni.
