Sikumik aserorterussuaq Oden Kalaallit Nunaannut ilisimasassarsioriartussaaq

Svenskit sikumik aserorterussuata Odenip imartaq nunatta avannaata avataaniittoq ilisimassarsiorfigiartussavaa.

Angalanissaq, katillugit 70 millioni koruuninik akeqartussatut naatsorsuunneqartoq, qaammallu sinnilaarlugu sivisussuseqartussaq, svenskit aamma danskit ilisimasassarsiortuisa suleqatigiillutik pilersaarusiorpaat.

Sikunik aserorterussuaq, Oden, Langeliniami Københavnimiittumi ullumi talinngasoq inunnit nuimasunit pulaarneqarpoq. Danskit svenskillu kunngissaat, Kronprins Frederik aamma Kronprinsesse Victoria, Ilisimatusarneq pillugu ministerimit Helge Sanderimit sikumik aserorterussuarmut pulaartinneqarput.

Oden augustip ulluisa aqqaneq-aappaanni Tromsømiit aallassaaq, nunatta avannaarpiarsuaniittoq imartaq ilisimasassarsiorfigiartorlugu. Svenskit danskillu ilisimatuui assigiinngitsunik paasiniaassapput, danskit immap itissusaanik immallu naqqata sananeqatai pillugit paasiniaassapput.

- Avatangiiseq aamma silaannaap kissassusaa pillugu ilisimasaqarnissarput pingaaruteqarluinnarmat ilisimasassarsiorneq piviusunngortinneqarpoq, issittumi ilisimasassarsiornermut ukioritinneqartunut taamaammat aamma tulluulluinnarpoq una ilisimasassarsiornissaq, ilisimatusarneq pillugu ministeri Helge Sander oqarpoq.

-Aap, aningaasarsiornissaq siunertaralugu ilisimasassassarsiornissamik oqartoqarsinnaavoq, immammi naqqata sananeqaataa paasiniaaffigissavarput, tamaanerpiarlu uuliaqarnissaa ilimanaateqarluarsinnaammat tamanna nangartarneqarsinnaanngilaq, Helge Sander oqarpoq.