Sikukkut qimusserneq ajornarsiartorpoq!

Siornatigut qimussit atorlugit illoqarfinnut nunaqarfinnulluunniit allanut angalasoqarsinnaagaluarpoq, sikoqanngimmalli

tamakku maqaasineqalerput.

- Pingaartumik Diskobugti eqqarsaatigalugu, sikukkut qimussimik illoqarfimmiit illoqarfimmukarsinnaanerput, pingaartumik 80-kkunni 90-kkunnilu atugaasarsimaqisoq maanna oqaluttuaannanngornikuuvoq.

KNQK-mi tassa, Kalaallit Nunaanni Qimussertartut Kattuffiani siulittaasoq Mikkel Jerimiassen taama oqarpoq.

Taanna oqaluttuarpoq, qimusserluni inoqarfinnut allanut nikissinnaanerit maqaasinartuusut. Taamalu ukiut tamaasa qimusserluni aavarnerit sassinerillu ukiut tamaasa pisarsimagaluartut aamma maqaasinartartut.

- Aasiaap eqqaani Akunnaami perornerput eqqarsaatigalugu, taamanikkut sikkorittartorsuugallarmat ukiut tamaasa aavartoqartarpoq qimussimik, taavalu aamma ukiut tamaasaanngikkaluartoq sassiartoqartarluni. Eqqaamasat tamakkua kingornuttaqattaakkat soorunami maqaasigineqarput aamma taqqavani, Mikkel Jerimiassen oqarpoq.

Taamatuttaaq sikukkut qilalukkanik sassisarnerup ukiorpassuarni pisarsimagaluartup misigineqartarunnaariartornera malunnarsiartorp.

- Sassisoqassappat soorunami imaappoq, imaq tamarmi qilalukkat najugarisaat neriniarfigalugu uninngaarfiat tamarmi sikusariaqarpoq sassisoqassappat. Nalunngilarpullu maannakkut taamaattoqassaarnikuuvoq. Aamma sassisoqaraangami Diskobugtimiikkajunnerusimavoq ilaannikkullu Vajgat-imi, aammalu ilaanni Qeqertarsuup qanigisaani taamaammat tamakku sumiiffiit sikussaarsimammata, maannakkut qaquguugaluarnersoq sassisarneq oqaluttuaannanngoriartortutut isikkoqarpoq.

Mikkel Jerimiasseni maanna Nuugaatsiami najugaqartoq erseqqissaavoq, qimussimik sukkaniulluni unamminissaq apriilip aallaqqaataani Sisimiuni pisussaq, ernumanartoqanngitsoq.

- Sikoqanngikkaluartoq nunami qimussertoqarsinnaajuaannarpoq, taamaattumik sikoqanngikkaluarpalluunniit qimussimik sukkaniunnissaq isumannanngilaq, Mikkel Jerimiassen oqarpoq.