Sikuki Nuuk Harbour A/S pilersinneqarpoq

Inatsisartut ukiakkut katersuunnerminni Nuummi umiarsualiviup allilerneqarnissaa akuersissutigereeraallu siulersuisut nutaat sulinissaminnut piareerput. 

- Attaveqaasersuinikkut Kalaallit Nunaannut pingaaruteqartorujussuarmik suliniummik matuminnga piviusunngortitseqataasinnaagama nuannaarutigaara. Umiarsualivimmik alliliineq inuiaqatigiit aningaasaqarniarneratigut silatusaartumik aningaasaliineruvoq Kalaallit Nunaannut tamarmut iluaqutaasussaq. Uanga siulersuisullu tamarmiusut pilersaarummi tassani soqutiginnittunik tamanik suleqateqarluarnissarput qilanaaraarput, siulersuisunut siulittaasoq Lars Karlsson:

Siulersuisunut ukua ilaasortaapput:

Siulittaasoq Lars Karlsson, Sverige, umiarsuarnik umiarsualivinnillu ingerlatsinermut annertuumik akuusimasoq. Sverigemi Danmarkimilu umiarsualivinnik arlalinnik sanaartornermut siunnersortaanertut Lars Karlsson ulluinnarni suliaqarpoq.

Siulittaasup tullia tassaavoq Haukur Óskarsson, Island, attaveqaqatigiinnermut tunngasuni pilersaarutini annertuuni, soorlu umiarsualiviliornernut annertuunut, siunnersuisutut ingeniøriusoq.

Ilaasortat allat tassaapput: John Rasmussen, Christine Tønnesen aamma Berit Koertz.

Sikuki Nuuk Harbour A/S-imut pisortaagallartussatut sulivoq Jesper Johannesen, ukiorpaalunni INI A/S-imi sulisimasoq tassungalu atatillugu sanaartugassatut ingerlatanut annertuunut misilittagaqarluartoq.

- Nuannaarutigaara siulersuisut nutaat tikilluaqqusinnaagakkit. Qularinngilara siulersui-sut piginnaasatigut nukittuunik inuttalersorneqarsimasut, Kalaallit Nunaata umiarsualivit-taarsuanut angisuumut pingaarnerusutigut suliassanik naammassinnissinnaasut. Ukiut pingajuata affaani sivikitsumik piffissaqartitaalluni umiarsualiviup qularnanngitsumik inaarneqarsimalernissaa eqqarsaatigalugu, siulersuisut sulilluarnissaannik kissaappakka, Naalakkersuisut Siulittaasuat, Aleqa Hammond, taama oqarpoq.