SIKUKI - Nuuk Harbour A/S-imi pisortaq nutaaq
Islandimiu Pall Hermannsson suliunnaarpoq, nunatsinnilu umiarsualiveqarnermi ilisarisimaneqarluartoq Royal Arctic Linemi pisortap tullerisimasaa John Rasmussen pisortanngortinneqarluni.
Pall Hermannsson SIKUKI-p Nuummi umiarsualivimmik pioreersumik tigusinissaanut umiarsualivittaassallu illorsuartassaanik sanaartornissaanut siuttussatut killilimmik piffissalikkamik atorfeqartitaasimavoq.
Misilittagartuullu John Rasmussenip umiarsualivittaassaq ukiortaamit atuutilerpat tamatuma ingerlanneqarnera maanna akisussaaffigisussanngorpaa.
Taanna nunarsuaq tamakkerlugu shippingimut, terminalinik umiarsualivinnillu ingerlatsinernik misilittagaqarpoq ukiunilu 25-inngulersuni ilaatigut Nuummi umiarsualivimmi pisortatut Royal Arctic Linemi atorfeqarsimalluni.
- Taamaammat John Rasmussenimik ilisarisimannittut natsorsuutigisimavaat toqqagassat akornanni toqqassallugu eqqortuusoq, SIKUKI-p siulersuisuini siulittaasoq Lars Karlsson taama oqarpoq, tamatumunngalu peqatigitillugu Pall Hermannsson Nuummi umiarsualivittaassap sanaartorneqarnerani sulilluarsimaneranut aamma qujassuteqarfigalugu.
