Sikuiuitsuq Kujalleq aakkiartupiloorpoq

Sikuiuitsumi Kujallermi siku 192 milliardi tonsi 2006-iinnarmi aalluni immamik qaffatsitserujussuarsimavoq.

NASA-p uuttortaanerata inernerini takuneqarsinnaavoq, immap ukioq 2100-mi 59 centimeterinik qaffassimanissaanik silap pissusaa pillugu Naalagaaffiit Peqatigiinni paasisimannilluartut oqarsimanerat mianersorneruvallaarsimasoq.

-Immat qaffannissaannik silap pissusaa pillugu Naalagaaffiit Peqatigiinni paasisimannilluartut eqqoriaasimanerat qanganisarpaluppallaaqaat. Sikummi taama annertutigisup aalluni immamut akuliunnissaa taakku ilanngullugu naatsorsuutigisimagunanngilaat, NASA-mi ilisimatooq, Rignot, aviisimut Politikenimut oqarpoq. Immap 2,5 meterimik ukioq 2100-mi qaffassimanissaa Rignot-ip ilimagaa.

-Ajornerpaamik pisoqassagaluarpat naatsorsuutigisinnaavarput, Kalaallit Nunaanniinnaq sikup aakkiartupiloornera eqqarsaatigalugu, immap meterimik ataatsimik qaffannissaa, Sikuiuitsoq Kujallermilu sikup aakkiartornerata imaq meterimik aamma ataatsimik qaffatsikkumaaraa, Rignot aviisimut Politikenimut oqarpoq.