Sikuiuitsup Kujalliup imartaani nipi eqqumiitsoq suunersoq paasineqartoq

Sikuiuitsup Kujalliup imartaata eqqaani nipi aalajangersimasumik tillernertut ittoq uteqattaartoq tusaasartik, aqqartartuni inuttaasartut 1960-ikkunni nalunaarutigisarpaat. Aamma nipip suminngaanneersuusinnaaneranik eqqoriakkat amerlasimaqaat. Tassaasorineqartarlutik nipit immameersut maannamut ilisimaneqanngitsut, imaluunniit sakkutuut atortorissaarutaat nutaaliaalluinnartut aalisakkalluunnit nipiliorneri.

Paasiuminaatsorli tamanna maanna paasineqarpoq.

Nipip uteqattaartuarnera patsisigalugu, inummit pilersitaasimanissaa amerlaqisunit eqqoriarneqartarpoq. Aamma uumasunit pilersitaasimassaguni sakkortuallaarsorineqartarluni.

Nipili immap ilaani taamaallaat aalajangersimasumiimmat aamma ukiup ilaani piffissami aalajangersimasumi tamaallaat tusaaneqarsinnaasarmat, pasitsaassaqarneq uumasunut nikittartunut saatsinneqaleriartorpoq. Taamaassorinninnerlu eqqortuusoq, nittartakkami Forskning.no-mi allaaserineqarpoq.

Nipi tikaagullinneersuussasoq, nipit immiussat nutaat paasinarsisippaat, nipiliornerallu qeerlutuut qarlortarnerannut eqqaanarpoq. Nipillu tusaaneqartartut oktobarimit decembarimut tusaaneqarsinnaasarput.

Ilisimatuut misissuisut nipimik paasiniaanerminni, tikaagulliit marluk Sikuiuitsup Kujalliup kippasissortaaniittut mikrofonimik immamiissinnaasumik kinaassutsimillu paasissutissiisinnaasumik atortulersimavaat. Arferit taakku nerisassarsiortarnerat sumiittarnerallu misissuiffiginissaat matumani siunertaavoq. Taama misissuinerminni nipi paasiuminaatsoq qangali paaserusunneqartartoq ilanngullugu paasisaqarfigaat.

- Tamanna paasigatsigu tuppallernartumik tupaallarujussuarpunga, Denise Risch, nalunaarusiami atuagassiami Biology Letters-imi saqqummiunneqartumi nalunaarusioqataasoq oqarpoq.

Tikaagulliilli piffissap ilaani qeerlutuutut sooq nipiliortarnersut ilisimatuunit suli paasineqanngilaq.