Sikuiuitsup Kujalliup imaata sikua sukkasuumik aakkiartortoq

Qalasersuup tungaanut immap sikua sukkasuumik aakkiartortoq oqaatigineqartarpoq, Sikuiuitsullu Kujalliup nalaani siku sukkasuumik aamma aakkiartorpoq.
Assi © : Michael Van Woert, NOAA NESDIS, ORA./Flickr
Allattoq Karsten Sommer
novembarip 18-at 2016 07:52
Nutserisoq Mads Lynge

Sikuiuitsoq Kujalleq qaammataasat atorlugit aamma nakkutigineqarpoq, Sikuiuitsullu Kujalliup nalaani ukiuni kingullerni 38-ni aatsaat taama sikuunngitsigisoq assit maanna takutippaat.

- Tamanna tupinnanngilaq, tamaanimi ataatsimut isigalugu aamma kianneruleriartortoq piffissami sivitsortumi ilisimagatsigu, Rasmus Tonboe, DMI-mi silasiortuneersoq oqarpoq, nangillunilu:

- Aatsaat taama sikuunngitsigaaq, immallu sikuata aakkiartornera naliginnaasumit ukioq manna sukkatsikkaluttuinnarpoq, Rasmus Tonboe oqarpoq.

Assi © : DMI
Sikuiuitsumi Kujallermi imaata sikuata 1979-imiilli uuttortarneqarnera. Ukiut asigiinngitsunik qalipaasigaapput. Ukioq 2016 immikkut nalunaaqutsigaavoq. Paasissutissat assitaliussarlu uanngaanneerput National Snow and Ice Data Center.

Immap sikuata siusinnerusukkut supinerata kingunerisaanik immap pisarnermit kissarnerulerneranik aamma kinguneqarpoq, Immap sikua taamaasilluni sukkanerusumik aamma aattarpoq, sukkanerujartuinnalissallunilu. Sikuiuitsoq Kujallermi taamaalisarnera ilisimatuut siornatigut takusimavaat.

Siku quppanitsiteriartuinnalertarpoq, iluliarujussuanngorsinnaallunilu, allaammi 5000 kvadratkilometerisut angitigilersinnaalluni, Qeqertarsuup affaata missaatut angitigisup uukkarsinnaanissaa aarleqqutigineqarsinnaalluni, DMI-mi ilisimatuut oqarput.