Sikuiuitsup avannarliup kangiatungaata sikua tamarmi aasaru nungussimassaaq

Sermersiuup silallu pissusaanik ilisimatuup, Olav Orheimip, Norgemi Polarinstitutimi pisortaanerusimasup, maannalu aamma Norgemi Det Internationale Polarårip allaffeqarfiani pisortaasup, siulittuutigaa, sikup aakkiartupiloornera ima sukkatigissasoq, umiarsuit suulluunniit Beringip imartaaniit Sibiriap Kangisissuata imartaatigoorlutik Norskehavikkooriarlutik Oslomukarsinnaalissasut. Aviisimi ullormut saqqummersartumi, Informationimi, taama allaaserinnittoqarpoq.

-Siorna aasakkut malugaarput Sibiriami Sikuiuitsup imartaani siku tamaani inoqalermalli aatsaat taama annikitsigisumik siaruartoq. Aatsaallu oktobarimi sikoqqippoq, tassa pisarnermiit sapaatip akunnerinik arlalinnik kingusinnerusumik, Olav Orheim oqaluttuarpoq.

-Tassa imaappoq immap sikua upernaaru saattuaraassaaq tassaassallunilu ukioq-manna siku pinngortoq, nalinginnaasumik tassaasaraluarluni siku issusooq, ukiuni arlalinni piusimasoq. Sikulu nallujasuararsuussaaq, Olav Orheim oqarpoq.

Olav Orheim aamma isumaqarpoq, Sikuiuitsumi sikup aakkiartornera nunarsuatsinnut tamarmut maannakkorpiaq annilaarnartuusoq. Erseqqissaatigaalu Sikuiuitsoq sikueruppat, Kalaallit Nunaanni sermersuarmut aamma sunniuteqassasoq, imavissuillu qaffannerannik tamanna kinguneqassasoq.