Sikuiuitsup Avannarliup imaata naqqa ilisimasassarsiorfigineqarpoq
Ilisimasassarsiortut immap naqqanik misissuisut misissukkallu inerneri kingusinnerusukkut nalilersuinerni eqqartuussisulersuinernilu atorluarneqartussaassasut, russit sikusiutaannit atomimik ingerlateqartumiit, suliat qanoq inerneqarnissaanik soqutiginneqisunit ikiorneqarlutik ingiallorteqarput. Immap naqqanik sajuppillatsitsisarluni atortut ajoqusersimapput, Kalaallit Nunaatalu avannaarsuani aqqut sivikillisaaffiginiarlugu avannaqqunniarnera aamma ajornartorsiutigineqarpoq.
Russit sikunik aserorterutaat sarpimminik ajornartorsiorpoq taamaattumillu iluaqutaasinnaanani, Aatsitassaqarnermut Pisortaqarfik taama paasissutissiivoq.
-Immap naqqa 130 kilometerinik isorartussusilik ullut marluk ingerlanerani sajuppillatsitsisarluta misissuiffigaarput, tamaani siornatigut taamatut misissuisoqarnikuunngilaq. Misissuinerput naammagisimaarparput umiarsuarnik tamaani siornatigut misissuisoqarsimagunanngimmat, svenskit sikunik aserorterutaanniit ”Oden”-imiit taama paasissutissiisoqarpoq.
Danskit-svenskillu ilisimasassarsiortitaat Kalaallit Nunaanni Tunup avannaatigut maanna ingerlaarput, immamut sikoqannginerusumukarlutik.
Ilisimasassarsiortut paasissutissanik katersuinertik suli ingerlappaat, misissuinerit qaammatip uuma qiteqqunnerani naammassinissaat naatsorsuutigineqarpoq.
