Sikuiuitsumi Kujallermi iluliarujussuaq kaanngaqqajaavoq
Avataarsualiartartut Europami Nakkutilliiviata Parisimiittup, ESA-p, qaammataasakkut assilisaanni tamanna takuneqarsinnaavoq.
Iluliaq taanna suli imaaniittoq, ilisimatuut aarleriartuinnarlutik ukiuni arlaqalersuni malittarisimavaat. Iluliaq taanna kikkorpassuarnut silasiutinngorsimavorlusooq, tassami silap kiatsikkiartornerata Sikuiuitsoq Kujalleq Nunarsuatsinni eqqornerpaammagu. Iluliaq taanna, Wilkinsip ilisivianik taaneqartartoq, 16.000 kvadratkilometeritut angissuseqarpoq, nunavimmiillu 1990-ikkunnili kaanngariartulersimalluni.
Sikuiuitsumi Kujallermi puttaarujussuit arfineq-marluk ukiuni kingullerni 20-ni aallutik nungussimapput. Sikuiuitsumi sikut eqimattat puttaarsuit taakku najummisarpaallusooq. Siku Sikuiuitsup Kujalliup Kitaatungaaniittoq aakkiartulissagaluarpat allanngoralerlunilu, imavissuit meterit arfinillit sinnerlugit qaffariassapput.
Ilisimatuut 1990-ikkunni siulittuutigigaluarpaat iluliarsuit Wilkinsip ilisiviatut angitigisut ukiut 30-t qaangiuppata aatsaat aakkiartulerumaartut, nungullutillu. Tamannali tassa maanna aallartereerpoq.
