Sikuiuitsoq avannarleq nunatsinnut ataneqarnersoq misissorneqalerpoq
Umiarsuaq avatangiisinik misissuinermi atorneqartartoq “Gunnar Thorson” nalinginnaanngitsumik maanna suliaqaleruttorpoq, tassa sikuiutsup avannarliup nunatsinnut ataneranut uppernarsaatissarsiorluni piareersarluni sulinermut ikiuulluni suliaqaleruttorami.
Umiarsuaq sapaatip akunnerani matumani Kattegat-imiippoq, immap naqqani uuttortaanermut atortorissaarutit nutaaliaalluinnartut misilerarlugit. Atortorissaarutit misilinneqareerpata svenskit sikumut aserorterutaannut “Oden”-imut ikkussuunneqassapput, taannami russit sikunut aserorterutaat “Sovjetskij Sojus” peqatigalugu aasaru sikumut nunatta sikuitsullu avannarliup akornanniittumut ingerlaartussaammat. Russit sikumut aserorterutaat atomimik ingerlateqarpoq nunarsuarmilu sikusiutsuni sakkortunersaalluni, taassuma svenskit sikusiutaat “Oden” aqqutissiussavaa nunatta avannaatungaani immap naqqanik uuttortaasinnaaniassammat.
Danmark, taamalu nunarput, USA, Canada aamma Rusland assigalugit sikuiutsumut avannarlermut piginnittuunerminik uppernarsaaniartussaavoq. Nunallu taaneqartut 2014 nallertinnagu piumasaqaatertik uppernarsiniartussaavaat, tamannalu siunissami sikuiutsumi avannarlermi uuliamik aamma gas-imik piiaasoqalissagaluarpat pingaaruteqartussaavoq.
Uuttortaanermi atortorissaarutit Aarhusip Universitetiani Danmarks aamma Grønlands Geologiske Undersøgelse, GEUS, suleqatigalugu ineriartortinneqarsimapput. Uuttortaalluni sulineq aggustip ulluisa 13-anni aallartinneqassasoq naatsorsuutigineqarpoq.
