Sikuijuitsumi kujallermi qaqqat uiguleriiaat paasiuminaatsinneqarput
Sermersuup naqqani fire kilometerisut ititigisumi uiguleriiaanik qaqqarsuaqartussaanngikkarluartoq ilisimatuut oqaatigaat.
Russit ilisimatusartut qaqqat Gamburtsevinik taasat Antarktisip qeqqaniittut 1950-ikkunni paasivaat.
Nunarsuup sananeqaataanik ilisimasat takutereerpaat, nunarsuaq nunavinnut arlalinnut aggorsimasoq, taakkulu imminnut katiguffiisa nalaanni qaqqat uiguleriit pinngortartut. Qaqqarsuit uiguleriit Sikuijuitsumi Kujallermiittut allaassutigaat nunaviup sineriaaniinnatik qeqqaniikkamik. Tamanna sumik pissuteqarnersoq ilisimatusaatigalugu qaammatini tullerni misissorneqassasoq, nutaarsiassaqartitsivik BBC allaaserinnippoq.
Ilisimatuut Storbrittaniamit, USA-mit, Tyslandimit, Australiamit, Kinamit Japanimillu pisut nunap sajunneranik misissuutit allallu sumiissusersiornermut itissusersiornermullu tunngasut atorlugit qaqqarsuarnik misissuileruttorput. Imaassinnaavoq aamma sermersuaq qillerlugu misissuisut.
Sikuijuitsup Kujalliup sermersua ukiunik millionimik ataatsimik pisoqaassuseqassangatinneqarpoq, nunarsuarmi sermersuarni pisoqaanersaanerarneqarluni.
