Sikuerukkiartornerani immami uumassusillit amerliartussanerarpaat

Immap ukiukkut sikuuallaartarunnaarneranut peqatigitillugu immap seqinnerfigitittarnera annertusiartussaaq, uumassutsinullu tamanna iluaqutaassalluni. Immami uumasuaqqat tappiorannartut ukiut 20-t 30-llu qaangiuppata pingasoriaammik amerleriarsinnaanissaat ilisimatuup Paul Batty-p, Pinngortitaleriffiimmeersup, eqqoriarpaa.
Allattoq Lotte Holm
marsip 06-at 2009 12:03

Uumasut nerisaqaqatigiit taamaasillutik nerisaqarluarnissaat eqqoriarneqarpoq. Paul Batty, silap pissusaa pillugu Aarhusip Universitetiani ataatsimeersuarnermut, “Beyond Kyoto”-mik taaguuteqartumut peqataavoq.

Uumasut nerisaqaqatigiit nerisaqarluarnissaannik oqarneq nutaarsiassatsialaagunaraluartoq, illuatungeqarpoq. Immap ukiukkut sikuuallaarunnaartarnera puisinut, aavernut nannunullu ajornartorsiutaassaaq, piniarfissat uninngaarfissallu ikilissammata, Paul Batty nassuiaavoq.

Immap uumasuarai amerliartorpata aalisakkat assigiinngitsut amerlanerit nerisassaqarlualissapput, ilisimatooq oqarpoq, eqqoriaanerinnaasorli aamma oqarluni.

Aalisakkat sorliit sunik nerisaqassanersut nalunarpoq, immalli uumasuaraasa amerliartornerat nerisaqaqatigiinnut iluaqutaanissaat eqqoriarneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq