Sikuata ataani uuliaarluertoqassagaluarpat iliuusissaaleqipput
Uuliasioqatigiiffiup BP-p pisortaa Anne Drinkwater immikkullu ilisimasallit allat Canadap naalakkersuisuisa ataatsimmiititaliaanit ataatsimiinnissamut aggersarneqarput.
Immikkut ilisimasallit inatsisartuni ilaasortamit Larry Bagnell-imit Youkon-imeersumit aperineqarput, sikup ataani uuliasiorluni qillerisoqartillugu ajutoortoqassagaluarpat qanoq iliortoqarsinnaanersoq ilisimaneraat.
Immikkut ilisimasallit taamatullu uuliasioqatigiiffiup BP-p Canadami pisortaata Anne Drinkwaterip naluaat sikup ataani uuliasiortoqarnerani ajutoortoqassagaluarpat qanoq iliortoqarsinnaanersoq.
Canadami uuliamik qilleriniarlutik qinnuteqartunut piumasaqaatit sakkortupput, USA-mi piumasaqaatigineqartunut sanilliullugit, Canadami ilanngutassiortoq Marianne Stenbæk oqaluttuarpoq.
Canadami uuliasiorluni qillerisoqartillugu qilleriviup saniani immikkut qillerisoqartarpoq ajutoortoqassagaluarpat uuliap naqitsinera tassuuna aniasinnaaniassammat.
Uuliasiortitseqatigiiffik BP Canada, immikkut qillerisoqarnissamik piumasaqaataasoq pinngitsoorniarlugu Canadami naalakkersuisut ataatsimititaliaanut qinnuteqarpoq.
Raymond Ningeocheak Nunavut Tunngavimmeersoq tusarniaanermi peqataasoq, tusarniaanerup kingorna nutaarsiassaqartitsivimmut CBC-mut oqarpoq, uuliasiortoqarnerani ajutoortoqarnissaa pinngitsoorniarlugu inatsisit maleruagassallu tamarmik atorneqarnissaat naggueqatigiinnit piumasarineqarnera erseqqissarpaa, tamanna qanorluunniit ajornartigissagaluarpat akisugaluarpalluunniit, Raymond Ningeocheak oqarpoq.
Tusarniaaneq Canadami inatsisartuni oqaluuserisassanngortinneqarpoq, naalakkersuisunut illuatungiliuttunit tamanna saqqummiunneqarmat, Canadami ilanngutassiortoq Marianne Stenbæk Montrealimit taamatut tusarliivoq.
